Fleire kontraktar innan oppdrett

Dei tilsette ved Rosendal Marineservice har på ingen måte tatt sommarferie enno. For det vert jobba iherdig med utrustinga av fire nye oppdrettskatamaranar.

Kvinnherad kommune har ein tradisjonsrik historie innan båtbygging, og ved skipsbyggjarhallen i Rosendal har det vore skipsbygging i generasjonar. Rosendal Marineservice er det siste selskapet som har adressa si i den store arbeidshallen på 2.500 kvadratmeter i Skålafjæro, og dagleg leiar Svein Arne Sæberg seier til Kyst.no at han er stolt av å ha arbeidsplassen sin på eit tradisjonsrikt område som dette.

 

Auke i tilsette og oppdrag

Bedrifta vart stifta i 2004, og har drive med opprusting og service dei seinare åra. I 2016 starta dei med oppdrag for havbruksnæringa, og i 2017 med utrusting av oppdrettsfartøy og modernisering av eldre fartøy for havbruksnæringa. Det med stor suksess. Ettersom oppdragsmengda har auka, har selskapet også tilsett fleire, og er per i dag oppe i ti fast tilsette.

Serviceverksemda har for tida inne fire fartøy som skal utrustast for Risnes Marine Craft, og Sæberg seier at dei har det svært travelt om dagen.

– Vi skal levera to oppdrettsfartøy i midten av juli til Tombre Fiskeanlegg, så no er det fullt køyr for å ferdigstilla desse før me tar sommarferie, seier han og påpeikar at dei så langt i år har hatt mykje arbeid.

Sidan dei starta med arbeid for oppdrettsnæringa har selskapet fått ei betre og meir føreseieleg ordremengd, ifølgje Sæberg.

– Vi er svært glade for at mengda med oppdrag innan havbruk aukar, og ser eit stort potensiale for endå meir av denne typen arbeid i åra som kjem, legg han til.

 

Auka omsetnad

Sæberg seier dei også kan visa til ein stor vekst dei siste åra. I 2017 auka omsetnaden frå 3,9 millionar kroner i 2016 til 7,1 millionar.

– Vi ser ein auke i oppdrag, og har ambisjonar om å utrusta endå fleire fartøy innan oppdrettsnæringa. Då også større fartøy, seier Sæberg.

Årsaka til at dei starta med utrusting innan oppdrettsnæringa var ein aukande etterspurnad om service og utrusting av nybygg frå oppdrettarar i Hardanger og Sunnhordland.

– Det er jo kjekt at vi kan vera konkurransedyktige sett mot land som Polen, der mange av oppdrettsfartøya tidlegare har vorte utrusta.

Selskapet får levert ferdige skrog i aluminium med styrehus frå Polen som dei utrustar i Rosendal.

– Vi monterer alt frå motorar og maskinar, kranar, vinsjar, kompressorar, høgtrykksspylarar og elektronikk til styrehuset, i tillegg til å gjera snikkararbeid på interiørsida. Vi gjer rett og slett alt utanom skrogarbeidet, fortel han.

Sæberg seier dei har ein god bedding i hallen og at dei har fått på plass ein krane som kan ta opp båtar på opptil 32 tonn.

– Vi har god plass til å gjera arbeid på mange fartøy samtidig, meiner han.

Åtte nye båtar

Selskapet brukar vanlegvis 12-15 veker på eit utrustingsoppdrag frå dei får skroget til levering av ferdig båt.

– Vi har ein god del oppdrettsbåtar som skal leverast framover. Seks stykk i år og to til neste år. Risnes Marine er kontraktspartnar og kunden vår, og dei har avtalar med oppdrettarane som dei leverer fartøya til etter at vi er ferdige med utrustinga.

I haust skal to fartøy leverast til oppdrettsselskapet Firda Seafood, som er Rosendal Marineservice si første levering til dette selskapet.

 

Lokal arbeidskraft

Arbeidsfeltet deira strekkjer seg frå hydrauliske, mekaniske tenester til produktutvikling.

– Våre fagfolk har mellom anna bakgrunn frå båtbygging og mekanisk industri, og vi utfører service på båtar og motorar i alle storleikar, fortel Sæberg, som seier han er glad for at Risnes Marine Craft har valt å gjera utrustinga lokalt, og påpeiker at dei som selskap har bevisst valt å ha lokal arbeidskraft.

– Alle som jobbar hos oss er frå Kvinnherad, og vi har ei fin spreiing i alder. Vi er glade for at vi kan bidra til ein auke i talet på arbeidsplassar og skapa ringverknadar i lokalsamfunnet.

Ein av dei tilsette er Kjetil Skåla (35). Han jobbar for tida med fartøya som skal leverast til Tombre Fiskeanlegg om få veker.

– Det er travle dagar no, ettersom vi held på med og ferdigstilla to fartøy før vi tar sommarferie, fortel han.

Skåla påpeikar at alle som jobbar på Rosendal Marineservice er «poteter», og må arbeida mykje med forskjelleg i løpet av ein arbeidsdag.

– Men vi trivst med dette. Eg gjer mellom anna mykje hydraulikk- og monteringsarbeid. Det er ein variert arbeidskvardag og tida går fort, seier han nøgd.

 

 

Tekst/foto: Therese Soltveit, Kyst.no