Folgefonna Opp:

Fjerde løp i Norgescupen

Morten Nygård

Morten Nygård

morten@grenda.no

Publisert: 3. august 2019, 15:00

Laurdag 10. august inviterer Uskedal IL og Ænes og Mauranger Bygdalag til motbakkeløpet Folgefonna Opp i Bondhusdalen.

 

– Løpet tar deg frå fjord til fonn på historisk grunn i mektig nasjonalromantisk natur. Folgefonna Opp vert arrangert for 8. gong, men inngår i år også som 4.løp i norgescupen for motbakkeløp. Alt ligg derfor til rette for at mange eliteløparar finn vegen til Mauranger akkurat i år. Juniorklassen startar samtidig med konkurranseløparane, men har målgang ved Gardshammar, 5 km ut i løypa, opplyser arrangørane i ei pressemelding.

Fyrste del av traseen følgjer Isvegen innover Bondhusdalen, deretter oppover den frodige Hillarslia med sine mange hårnålssvingar, til Gardshammar (745 moh). Vidare følgjer løparane den T-merka stien inn i eit alpint landskap, og kjem i mål etter 11 km ved Fonnabu turisthytte (1.460 moh).

– Sjølv om vi vil ha mange med i konkurranseklassen, blir vi like glade for alle mosjonistar som vil delta. Bruk høvet til å koma deg ut på ein flott fjelltur, eller test deg sjølv i kva form du er i, med det tidspresset du legg på deg sjølv. Krav for fullført løp i mosjonistklassen er minimum til Gardshammar, står det i meldinga.

Fristen for påmelding er sett til 4.august. Løyperekordane tilhøyrer Lars Erik Skjervheim 1.19.01 og Mai Britt Buer 1.40.21.

 

Barkebåtløp

Same dag vert det skipa til folkefest inne på Sandarvollen, 2 km lett gange frå parkeringsplassen i Bondhusdalen. Barneløpet har same start og same startpistol som motbakkeløparane, og målgang er inne på Sandarvollen med premie til alle. Her blir det også Maurangermeisterskap i barkebåtløp og mjølkespannhalding, øksekasting, støvelkast, ansiktsmaling og quiz. B-gjengen frå Rosendal Musikklag står for den musikalske underhaldninga.

Om kvelden blir det «After Run» ved Hardanger Fjord Lodge.