– Fjelberg Kraftlag – frå samvirkelag til aksjeselskap

Fjelberg Kraftlag (FK) vart skipa i 1947. Sidan etableringa har FK gjennom over 70 driftsår vakse og utvikla seg saman med lokalsamfunna våre.  Me har i dag eit moderne og robust kraftnett i heile dekningsområdet. Me har òg bygt ut breiband til bygdene våre.

 

Endra rammevilkår:

Dei årlege investeringane har me gjennomført ved hjelp av god drift og gode rammevilkår. Trass i årlege justeringar, har rammevilkåra i vår bransje i hovudsak vore stabile og gode. Dei næraste åra vil dette endra seg vesentleg.

Stortinget har fastsett nye krav til organisering av alle kraftselskapa, noko som særleg vil få store følgjer for dei små selskapa, slike som FK. Frå 1.1.2021 er det innført krav om eit selskapsmessig skilje. Dette inneberer at FK, som har all verksemd i eitt og same selskap, må organisera konkurranseutsett og monopolbasert verksemd i to eller tre ulike selskap. Kort fortalt er FK pålagt å gjennomføra ei omfattande reorganisering av FK til eit konsern – om ein føreset vidareføring av dagens aktivitetar.  FK er eit av landets minste nettselskap, og rapporteringskrava og kvalitetssikringa på vårt selskap er like strenge som for dei store. Kostnadane frametter vil vera svært store for å tilfredsstille gjeldande lovverk og dei nye lovene og forskriftene som vert pålagt. Det vil difor etter alle solemerker bli auka nettleige og lågare kjøpsrabatt for medlemmene dei komande åra.

 

Styret sitt arbeid for medlemmene:

Styret har arbeidd aktivt dei to siste åra for å finna gode løysingar for FK. Årsmøte i 2017 gav samrøystes styret ordre om å legge fram sak om strukturendring. Siktemålet for oss i styret har vore å sikra verdiane og kompetansen som ligg i selskapet og samtidig leggja til rette for vidare vekst og utvikling i bygdene våre ved mellom anna redusering av nettleiga. Sikring og utvikling av lokale arbeidsplassar var òg sentralt for styret i dei forhandlingane me skulle gjere mot interessentane.

I det vidare arbeidet har styret vurdert gode alternativ. Me hadde inne advokatfirma Schjødt som vår profesjonelle støttespelarar, og fekk svært god hjelp i alle fasane av prosessen – frå forhandlingsstadiet, tilrettelegging og gjennomføring av bodgjeving og fram til endeleg avgjerd, og mai 2018 signerte styret i FK intensjonsavtale med tanke på samanslåing med Haugaland Kraft (HK). Berre ved ein open bodrunde mellom interessentane kunne styret oppnå ein høgast mogleg verdi på kraftlaget. Styret oppnådde med dette ein verdi som låg kr 60 millionar over verdsettinga som BKK og HK hadde innhenta. Ein oppnådde ein samla pris på kr 310 millionar. Det er såleis ein svært god verdi som er sikra for medlemmene med den prosessen styret har gjennomført. Etter dette har Schjødt hjelpt oss med utarbeiding av Integrasjonsavtale (transaksjonsavtale) og kvalitetssikra omdanningsdokumentasjonen utarbeida av advokatfirma Thommessen.

Det er avhalde informasjonsmøter på Halsnøy og Valen i oktober. Meir info ligg òg på våre heimesider; www.fjelberg-kraftlag.no

 

Sjølve omdanninga:

Den 6. desember skal ekstraordinært årsmøte ta stilling til om me skal omdannast frå samvirkelag til aksjeselskap. Vedtak om samanslåing/fusjon mellom FK og HK må gjerast av eigarane på generalforsamlinga i det omdanna i Fjelberg Kraftlag AS og Generalforsamling i HK etter at stiftelsestilsynet har godteke omdanninga.  Omdanninga frå samvirkeføretak til aksjeselskap er difor ikkje eit mål i seg sjølv, men eit naudsynt steg for å leggja til rette for den etterfølgjande samanslåinga med HK. Etter at Kraftlaget er omdanna til aksjeselskap kan samanslåinga med HK gjennomførast som ein skattefri transaksjon i samsvar med reglane i aksjelova. Som samvirkeføretak kunne ikkje Kraftlaget ha vore part i ei slik samanslåing og heller ikkje vore eigar av ein minoritetspost i Haugaland Kraft AS.

 

Hovudpunkta i framdrifta:

• FK vert omdanna frå samvirkelag til aksjeselskap. Berre då kan me få til ein skattefri samanslåing med anna aksjeselskap.
• Omdanninga må skje etter krava i Samvirkelova, og krev sakleg grunn.

Artikkelen held fram under annonsen.
• Sakleg grunn ligg føre då omdanninga er å sjå som ei tilpassing til dei endringar lovgjevar ønskjer ved å endra energilova – nemleg at energiselskap skal slå seg saman for å møte dei nye rammevilkåra. Det er altså styresmaktene som oppmodar små nettselskap til å omdanne seg for å møte notidas krav til drifting av nettselskap.
• Det enkelte medlem sin eigardel av aksjeselskapet er regulert i samvirkelova som seier at det er den enkelte medlemmen sin samhandel med FK SA dei siste fem åra som avgjer kor mange aksjar kvart medlem får. Gangar ein talet på aksjar som alle medlemmene har fått oppgitt i brev frå FK med kr 2,70 per aksje, ser ein kva verdi medlemmen sine aksjar har.
• FK sine eigedelar vert fisjonert (skild ut) ned til eit selskap som fusjonerer (vert slege saman med) HK og FK får aksjar i HK som oppgjer for dei verdiane som blir fusjonert inn i HK.
• Alle tilsette i FK er sikra arbeid og dagens lønsvilkår samt oppmøtestad på Bjoaneset i 15 år etter samanslåing med HK.
• HK vil vidareutvikla FK sin avdeling i Halsnøy.
• Nettleiga for ein gjennomsnitts husstand per år (22.000 kWh) vil gå merkbart ned, omlag 21 øre per kWh, noko som gir omlag 4.525 kr billigare nettleiga.
• Nye FK AS vil motta utbytte av aksjane i HK for 2019.
• Nye FK AS kan krevja at HK kjøper aksjane i løpet av 2019, jf Integrasjonsavtale punkt 2.3. Etter dette er det opp til FK AS å eventuelt vedta å dele ut pengar til eigarane (dagens medlemmer) i samsvar med aksjelova sine reglar.

Artikkelen held fram under annonsen.
• HK er eigd av kommunane på Haugalandet samt Finnås kraftlag på Bømlo, Skånevik Ølen Kraftlag AS og Fitjar Kraftlag.
• HK vil med sin storleik, solide økonomi og breie kompetanse ha kapasitet til sikra trygg kraftforsyning i FK sitt dekningsområde i framtida

 

Stiftelsestilsynet:

Styret registrerer at nokon hevdar at stiftelsestilsynet ikkje vil kunne godta omdanninga. Det stiller styret seg undrande til – all den tid FK har lagt opp løpet på same måte som Skånevik Ølen Kraftlag SA (SØK) gjorde. Me nyttar same advokat (Stig Berge i adv.fa. Thommessen) og me veit at like tilhøve skal handsamast likt av eit forvaltningsorgan.

Til illustrasjon har eg difor teke med konklusjonen frå stiftelsestilsynet i SØK datert den 21.04.2017;

”Etter Stiftelsestilsynets vurdering er omdanningen som SØK gjennomfører å anse som en tilpasning til de endringer lovgiver ønsker ved å endre energiloven. I siste avsnitt under punkt 6.1 omtaler departementet omorganisering av AS og SA på følgende måte:

«Aksjeselskaper og samvirkeforetak kan fisjonere og fusjonere med skattemessig kontinuitet og uten dokumentavgift. Både samvirkeforetak og kommunale foretak kan også omdanne seg til AS uten dokumentavgift.»

Stiftelsestilsynets vurdering er at departementet ønsker at nettselskap skal slå seg sammen med andre for å møte kravene i energiloven. Som følge av at SØK er organisert som et samvirkeforetak må en før sammenslåing med et aksjeselskap omdanne seg til et AS. Etter Stiftelsestilsynets vurdering foreligger det derfor en saklig grunn for omdannelsen til AS.”

Denne endringa er ei stor hending for FK SA, og styret er overtydde om at dette vil sikra verdiane og kompetansen som ligg i selskapet, og at det vil vera den beste måten for FK å sikra vekst og utvikling i dekningsområdet vårt.

 

Vel møtt den 6. desember.

Med venleg helsing

Sverre Olav Handeland, styreleiar Fjelberg Kraftlag

12.11.2018