Sommaren 2015 støypte Terje Ljostveit fast den siste rekka med teglstein på omnen. Søndag ettermiddag kan alle interesserte få smaka brødbakst herifrå. (Arkivfoto).

Film og brødbakst på Seim

Søndag ettermiddag inviterer Seimsfoss Grendalag til opning av Laftastovo, brødbakst og visning av den nye filmen om Guddalsdalen.

Arrangøren kallar komande søndag ein merkedag både for Seimsfoss Grendalag og for heile bygda. Det startar ved elva. Der skal det markerast at Laftastovo er ferdig.

Artikkelen held fram under annonsen.

– Vi fyrer opp i steinomnen i stova, og går alt etter planen vert det høve til å få smaksprøvar av bakst. Etter denne markeringa er det tid for litt kaker og kaffi i «skyttarhuset» og ei utlodding, før filmen skal visast, skriv grendalaget på Facebook.

At baksten smakar godt kan grendalaget garantera. Dei hadde nemleg styremøte i Laftastovo måndag kveld, og fekk då smaka brød steikt i steinomnen.

 

Nye stolar

Fredagen før fekk også nokre heldige utvalde sjå filmen om Guddalsdalen. Den er laga av Merete Offerdal Tveit.

– De som har tenkt å ta turen denne dagen har mykje å gle dykk til. Vi ser fram til dette, og vonar at bygdefolk vil setja pris på det som vert synt fram, skriv Seimsfoss Grendalag.

Det kan elles nemnast at det nett er kjøpt inn 100 nye stolar til gymsalen i «skyttarhuset». Investeringa kom i stand gjennom eit økonomisk samarbeid mellom helselaget, skyttarlaget, grendalaget og litt av overskotet etter 17. mai.