Festivalklart på Borgundøy
Etter fleirfaldige timar med arbeid, er ungdomen på Fjelberg no veldig spente på korleis den fyrste St. Hans-festivalen på Borgundøy vert teken i mot.
– Eg kjenner at nervane byrjar å koma no. Vi har jo lyst at det skal bli så bra som vi har tenkt, me har jobba på og fått på plass eit program vi er nøgd med og som vi håpar folk vil lika, seier Sølvi Marie Berge.
Artikkelen held fram under annonsen.
Ungdomen trør til
«St. Hans-festivalen» på Borgundøy er den fyrste i rekkja, men kom til etter at ungdomane øya fann ut at dei ville skapa litt liv på Borgundøy.
– Me tenkte at ungdomen no måtte trø til, og bestemte oss for å laga ei slags oppgradering av øyadagane, seier Berge.
No er festivalplakaten klar, og det er eit fullsett program frå fredag kveld til søndag ettermiddag Sølvi Marie og dei andre har fått på plass.
– Me ynskjer at dette skal vera eit arrangement for heile familien, så her er det rekekveld for både liten og stor, og vidare aktivitetar for alle. Men så har me bestemt oss for at det etter ei viss tid berre er for vaksne, då vert det musikk og festen byrjar, seier Sølvi Marie.
Fredag er det Haavard Skaatun og Helge Elias Larsen som står for underhaldninga.
Artikkelen held fram under annonsen.
Konsert på fjellet
Laurdag vert det aktivitetar frå morgon av, før det er klart for eit nysirkusshow for heile familien.
– Det vert pyroshow, akrobatikk og ulike konkurransar og aktivitetar for heile familien, seier Berge.
Rockebandet Pollution og Ove Støylen står for underhaldninga laurdag kveld.
Søndag skipar ungdomane til noko som aldri før har vore gjort på øya.
– Det er kanskje høgdepunktet. Då lagar me til konsert på Borgundnuten, det har aldri blitt gjort før. Så det er berre å kryssa fingrane for fint vêr, seier Sølvi Marie.
Om du har lyst å ta turen Borgundøy denne helga, men slit med skyss heim, er det berre å ta kontakt med Sølvi Marie i god tid på førehand, så skal arrangørane prøva å få til noko.
– Det finst ikkje plassar som er finare enn dette, så vi vil visa det fram til alle og alle er sjølvsagt velkomen. Så skal vi gjera det så lett som mogleg for alle å koma, sluttar ho.