Festdag på isen

Torsdag la Ølve Montessoriskule bøkene igjen i Dalsjøen og tok skeisene fatt på Kroktjørna.

Frostveker som den me har bak oss no, kjem ikkje kvart år. Dagevis med stille og kaldt utan nedbør har gitt oss trygg og god skeiseis fleire stader i kommunen. Både i skuletida og på ettermiddagane har store og små visst å nytta seg av mogelegheitene som baud seg.

Ølve Montessoriskule sette av torsdagen til leik på frose vatn.

– Det er fire år sidan sist me kunne gjera dette, sa Marit Synnøve Bergheim Lyhammer.

Kontaktlæraren skeisa lett og erfarent over isen i Stussvik, saman med 23 elevar og fire kollegaer.

– Og me må nytta høvet når me har det, slo ho deretter fast.

 

16 cm tjukk

Inne på land har dei fyrt opp bålpanna og laga seg varmande tomatsuppe med makaroni, til både nytte og glede for dei som skulle halda ut i timesvis på skeisene.

– Det er veldig så kort tid det tar frå dei er nølande og usikre, til dei dansar rundt på isen utan problem. Dette tar dei veldig fort, meinte Marit Synnøve og nikka mot elevar som susa rundt på isen i stor fart.

– Me har målt isen til 16 centimeter, så det er trygt og godt, fortalte Tore Neteland medan han gjorde klar køller og ballar til ein runde bandy for elevane.

Det bidrog til endå meir fart og leik på isen. Og slik susa dagen av garde, til suppegryta var tom, skulebarna slitne og skeisene godt nøgde med dagens innsats.