Fagforbundet Kvinnherad med tur til Eikemo

Freelands Grenda

Grenda

post@grenda.no

29 august, 2018

Fagforbundet Kvinnherad si ufør- og pensjonistgruppe hadde ein ny tur til Eikemo i Åkrafjorden torsdag 23.08.18.

Turen starta på Husnes, bussen køyrde innover og plukka opp folk. Siste stopp var Enes, då var det 35 i bussen. Då me var framme på Åkrafjordtunet kom det to til frå Stord som ville vera med oss. Etter litt handling og kaffi, gjekk me ned til kaien, der båten Stein Viking låg å venta på oss.

Båten gjekk frå land og «seig» innover fjorden, medan guiden Nina Kaltwasser fortalde kva me såg.

Då me var kommen til kaien på Eikemo, kom Geir Arne Eikemo med traktor og hengar for å henta oss. Alle fekk plass i hengaren på traktoren og det bar på opp på den svingete vegen. Geir Arne fortalde om alvor og humor om liv og lagnad for gardar og folk i før og nåtid.

Vel oppe på garden Eikemo gjekk folk litt rundt å såg seg om og Geir Arne fortalde  meir om Eikemo. Det er berre fire som bur der framleis.

Systera til Geir Arne, Marta kom, ho var nummer fem i søskenflokken på ni, (Geir Arne er yngst). Marta les dikt for oss og det var forfattaren sjølv som les. Om me kom att neste år skulle ho sitja utanfor gamlahuset og signera bøkene sine til oss.

Me vart ropa inn i huset og der var det dekka til oss alle 37. Me åt god rømmegraut med flatbrød og spekemat attåt. Kaffi og lefsa fekk me ute på tunet. All maten me fekk var lokal og kortreist mat.

Transport i spesialkøyretøy høyrde med.

Gruppa delte seg og nokon gjekk med Kjell som og er bror til Geir Arne, for å sjå på hytta hans.

Alle var samla igjen og turen gjekk ned att til kaien.

Båtturen gjekk vidare innover fjorden, der me såg på murane som var bygd opp for den gamle vegen i Åkrafjorden. Så kom me inn til Langfoss, båten gjekk heilt inn i fossen. Ein av mannskapet på båten, holt ut ei bøtta, og vips fekk me drikkevatn alle saman og dei som sat framme på båten ein dusj av Langfossen.

Båten svinga og me gjekk langs landet på Mosnes, der var ikkje lenger nokon fastbuande, berre mange fine hytter. Deretter luffa me attende til kaien ved Åkrafjordtunet. Alle kom seg av båten og gjekk opp i bussen og då alle var klar køyrde me til Odda. Hadde ein liten pause der, så køyrde me heim att til Kvinnherad.

Været var strålande, dagen før og dagen etter ausa regnet ned, men me hadde ikkje ein dråpe på oss. Bortsett frå dusjen i Langfoss.

Vil takka kvar og ein som var med på turen og ei særs takk til buss sjåføren Nygård som køyrde oss trygt fram og heim att.

 

Fagforbundet Kvinnherad

Aud Sigrun Fausk, Liv Sæbø Eik og Astrid Irene Ljone