Etterlyser kassebil med fire menn

Ein gong i førre veke vart det gjort innbrot i seks hytter i Ølve. I samband med dette ynskjer politiet kontakt med folk som har observert ein VW Caravelle kassebil.

Fredag kveld fekk Fusa og Tysnes lensmannsdistrikt melding om at det pågjekk innbrot i nokre hytter i Hamarhaugskogen i Ølve.

– Vi rykte ut med blåljosa på, men då vi kom fram viste det seg at det ikkje var korrekt at innbrotet pågjekk. Vi hadde ein runde i feltet med nokre av hytteeigarane, og då vart det oppdaga at nokon hadde brote seg inn i seks av dei 14 hyttene der, fortel politioverbetjent Ove Ivarhus.

Artikkelen held fram under annonsen.

 

Utanlandsk

Han meiner innbrota må ha skjedd i tidsrommet måndag til fredag morgon i førre veke. Gjerningspersonane har brote seg inn gjennom dørene og rote rundt inne i hyttene.

– Dei har ikkje fått med seg store verdiar. Men det er teke noko alkohol, radioar, eitt veggur og eit sett med små krukker. Vi har ikkje full oversikt enno, då vi ikkje har snakka med alle hytteeigarane, seier Ivarhus, som er svært interessert i tips og observasjonar.

– Vi bed alle som har sett noko ta kontakt med oss, og dette er ei sak vi prioriterer. Spesielt er vi interesserte i informasjon om ein utanlandskregistrert Volkswagen Caravelle kassebil, som vart sett i Ølve fredag morgon. Det var fire menn i denne bilen, fortel Ove Ivarhus, som ikkje veit om bilen har noko med saka å gjera.