Etterlyser armringen frå Hatteberg

Fleire av dei stolne vikingskattane er kome tilbake til museet, men den verdifulle gullarmringen frå Hatteberg er framleis på avvegar.

No går Universitetsmuseet i Bergen ut og etterlyser den verdifulle biten frå kulturarven.

– Det er ein tragedie. Vi er frykteleg lei oss for den unike armringen frå Hatteberg framleis er på avvegar, og vi vil no gjera alt det vi kan for at vi skal få den tilbake, seier instituttleiar Asbjørn Engevik ved Universitetsmuseet i Bergen til Grenda.

 

Unik skatt

Store delar av den stolne vikingskatten er komen museet i hende og tre menn i 40-åra er arrestert etter museumsbrekket i Bergen 14. august i år. Men framleis saknar museet ein av sine mest spesielle skattar. Den 104 gram gullarmringen frå Hatteberg.

– I vikingtida var ikkje gull vanleg, og veldig få gjenstandar frå den tida er av gull. Difor er denne skatten ekstra unik, og er ein veldig populær og verdifull skatt i vår kulturhistorie, seier Engevik.

Det at den er i gull kan og bidra til at den er enklare å omsetja vidare, difor går museet no hardt ut for å unngå det.

– Fyrst og fremst er vi mest oppteken av å fora politiet med mest mogleg informasjon slik at dei kan gjera ei best mogleg etterforsking. Så håpar vi veldig sterkt at vi får armringen i hende igjen. Det er òg difor vi no går ut og etterlyser den, for å gjera folk merksame på det, slik at det er vanskeleg for den som sit på den å eventuelt selja den vidare, seier Engevik.

 

Resten tilbake

Men Engevik har ikkje berre dårlege nyheiter å koma med. Resten av Hattebergskatten, den store halsringen og ringnåla, er trygt tilbake på museet.

– Halsringen er litt skada i eine enden. Det kan sjå ut som tjuvane har forsøkt å opna den i opnemekansismen, men vi har alle delane og vil klara å fiksa den. Ringnåla har vi alltid hatt, tjuvane stakk av med kopien, men også den har vi fått tilbake. Og det er vi glad for, sluttar Engevik.