EP-klar valebu

Marius Tveit Nissestad

Marius Tveit Nissestad

marius@grenda.no

Publisert: 16. august 2018, 09:57

22. august slepp Catnip Cloud EP-en «Magical Stones and Signs from Above».

23-år gamle Kjartan Thorkildsen frå Valen studerer for tida ved NTNU i Trondheim, og har det siste året gitt ut fleire låtar under artistnamnet Catnip Cloud. Fleire av dei har blitt anbefalt av NRK P3 Urørt, og hans største hit «Places» er spelt av over 600.000 gonger på dei ulike strøymeplattformane det siste halve året.

På «Magical Stones and Signs from Above» gjer han lyttarane fem nye låtar som blandar element frå elektronisk musikk saman med live-instrument, noko artisten sjølv meiner skapar mystiske og eventyrlege lydbilete.

– Stort sett har eg spelt inn, produsert, sunge og miksa alt åleine på hybelen. Her finn du alt frå dansbare elektroniske beats til billige plastikk-keyboard frå 80-talet og vokal spelt inn på laptopmikrofon. Låtane er også utbrodert med ei rekkje små lydeffektar som heile tida går i bakgrunnen. Dette er alt frå regndropar som treff teltduken, folk som både skrik, smattar og ler, dyr i skogen og ei rekkje abstrakte og surrealistiske lydklipp, skriv Thorkildsen i ei pressemelding.