Endeleg byggjestart

Det har teke åtte år med mange krevjande utfordringar undervegs. Men no er det endeleg klart for oppstart i byggjefeltet Øvre Neslia i Rosendal.

Utbyggjarselskapet heiter Neslia Øvre AS og vart stifta sommaren 2010. Bak står Rosendal Eigedom AS og Kvinnherad Bygg AS, som eig 50% av aksjane kvar. At det skulle ta nesten åtte år før bygginga kunne koma i gang, hadde nok ingen av dei involverte sett for seg.

– Det har vore utruleg krevjande, vedgår styreleiar Knut Johannes Helvik.

Selskapet har desse åra laga reguleringsplan og forhandla med grunneigarar og skogeigarlag. Dei har også handtert krav om rassikring, som vert oppfylt ved å byggja ein ny skogsveg i underkant av dagens granfelt. Ei anna stor utfordring er høgspentlinja som går gjennom området. Den skal no ned i bakken.

– Då linja vart fornya for nokre år sidan, så var området allereie avsett til bustader. Ein burde då lagt linja utanom, og ikkje fått lov til å ha traseen rett gjennom eit bustadfelt. Vi vil difor søkja kommunen om å få dekka kostnadane med å leggja høgspentlinja i jorda, seier Helvik.

Neslia Øvre AS er også plikta å betala for ei forlenging av gang- og sykkelvegen med om lag 150 meter.

– Det er urimeleg at eit byggjefelt skal ta ei slik belastning for noko som kjem fellesskapet til gode. Vonleg slepp vi å betala for dette, seier Helvik, som òg nemner at det skal byggjast støyskjerming mellom gang- og sykkelvegen og bustadfeltet.

 

Samarbeid med kommunen

Ei viktig årsak til at ting no er i ferd med å ordna seg, er ein samarbeidsavtale mellom Neslia Øvre AS og Kvinnherad kommune. Sistnemnde vil stå som utbyggjar av infrastruktur som veg, vatn og kloakk, og deretter fakturera Neslia Øvre. Poenget med å gjera det på denne måten, er at ein vil å momsen refundert. Like før jul teikna kommunen kontrakt med K. Hjelmeland AS om å gjera denne jobben.

– Formannskapet gjorde eit prinsippvedtak om å opna for slikt samarbeid for eit par år sidan. Så vidt eg kjenner til er Øvre Neslia det fyrste feltet som blir utbygd i eit slikt samspel. Utan momsrefusjonen så hadde tomtene blitt tilsvarande dyrare, fortel Knut Johannes Helvik.

No i januar vert det byggjestart for det tekniske anlegget. Avkøyrsle til feltet vil koma rett ovanfor den midtarste nedkøyrsla til Neslia, slik at det vert danna eit T-kryss.

 

Husnes og Odda

– Det er utruleg fin utsikt her oppe, smiler dagleg leiar Svein Bjarte Veastad, som også er dagleg leiar i Kvinnherad Bygg.

Per i dag er det seld tomter til tre einebustader og éin tomannsbustad. Sal av fire tomter var minstekravet for å få finansiering til prosjektet. Fullt utbygd har feltet plass til 35 tomter, som vil gje totalt 50-60 bueiningar.

– Vi veit om fleire som vil flytta hit, opplyser Veastad. Han reknar med at det fyrste huset står ferdig til hausten.

– Det kjekkaste er at tomtene er selde til barnefamiliar, så her blir det liv og røre. Utbygginga hjå Hydro Husnes og veksten i Odda er dessutan positivt for oss, for feltet er plassert midt på denne industriaksen, seier Knut Johannes Helvik nøgd.