Eksplosjon i Uskedalen – mann i 40-åra sendt til Haukeland (oppdatert)

Freelands Grenda

Grenda

post@grenda.no

11 mars, 2018

Ein mann i 40-åra er sendt til Haukeland universitetssjukehus med luftambulanse etter ein eksplosjon i eit næringsbygg i Uskedalen.

– Luftambulansen har fått pasienten om bord, og er på veg til Haukeland, seier operasjonsleiar Ole Jacob Hartiksen frå 110-sentralen til Bergens Tidende.

Det var klokka 16.10 at alle naudetatane rykka ut til Uskedalen etter meldingar om ein eksplosjon i eit næringsbygg.

Ikkje lenge etter kunne 110 Hordaland melda om at det var snakk om ein eksplosjon i ein hall og at staden var gjennomsøkt.

– Hallen er gjennomsøkt. Det er ikkje fleire personar i hallen, skriv 110 Hordaland på Twitter.

Politiet veit førebels ikkje kva som er årsaken til eksplosjonen, og ber folk om å ikkje oppsøka området.

Den skadde personen fekk behandling av helsepersonell på staden, men er no på veg til Haukeland universitetssjukehus.

Politiet skriv klokka 17.00 at dei har fått kontroll på staden og at det ikkje er fare for ytterlegare eksplosjonar.

I følgje 110-sentralen er det truleg snakk om ein propaneksplosjon.

 

Kvinnherad lensmansdistrikt fekk assistanse frå Hardanger lensmansdistrikt  til å gjera åstadsundersøkingar.

– Me kan ikkje stadfesta at det er propan som har forårsaka eksplosjnen. Det vart gjort arbeid då det eksploderte, og med kva kraft veit me ikkje enno. Men eksplosjonen påførte mannen skadar, spesielt riftskadar. Skadeomfanget er førebels ukjent for oss, men det at han vart sendt med luftambulanse seier sitt om alvorleggraden, kommenterer Vidar Litle-Kalsøy, politibetjent i Hardanger lensmansdistrikt, til Grenda.

Politiet skulle halda fram med åstadsundersøkingar utover kvelden.

– Me kjem til å vurdera om me treng andre si hjelp i undersøkingane, la han til.