«Ein sjømanns grav på Curaçao»
Måndag kveld inviterer Kristian Bringedal og Reidar Ådnanes til føredrag, salmesong og innslag om Jakob Sande i Uskedal kyrkje.
Den 5. april i år kunne Grenda fortelja den dramatiske historia om då Oskar Selmer Bringedal frå Uskedalen mista livet etter ei fallulukke om bord M/T «Anna Knudsen» i 1938. Samstundes skreiv vi om detektivarbeidet som den 6. desember 2017 resulterte i at nevøen Kristian Bringedal og Gunnlaug Eik fann grava til Oskar på den karibiske øya Curaçao.
Artikkelen held fram under annonsen.
Kristian avslørte samstundes at han planla eit program saman med sokneprest på Husnes og tidlegare sjømannsprest Reidar Ådnanes. Tittelen var allereie bestemt: «Ein sjømanns grav på Curaçao». No er også tid og stad klar: Måndag 22. oktober i Uskedal kyrkje.
Mista far sin
Kristian Bringedal skal fortelja om sjømannen Oskar Bringedal, hans fallulukke, død og grav. Reidar Ådnanes mista far sin på sjøen i 1956, og skal fortelja den tragiske historia om MS «Sagvaag» som forliste på veg frå Odda til Oslo med karbid. Alle ni om bord omkom. Han skal òg snakka om sjømannskyrkja og sjømannspresten, og om død og gravlegging langt borte frå heimen. Eit høgdepunkt blir garantert også Ådnanes sitt innlag om Jakob Sande og sjøen.
Både Mannsgruppa Bakmennene, Kyrkjekoret Nordsaang og organist Eva Megyesi bidreg med musikalske innslag. Det vert vidare sett av tid til allsong av sjømannsrelaterte salmar.