– Ein merkedag i historia for bygdene våre
Idrettslaget Ternen kunne heisa flagget til topps torsdag kveld. Då vart reguleringsplanen for Erslandsparken nemleg einstemmig vedteken i kommunestyret.
– No er ventetida endeleg over. Dette er ein gledas dag. Som kjend kar frå bygda vår sa for nokre år sidan; «Her skal vi byggja identiteten vår». Eit utsegn me er heilt einige i. Tenk kor mange gleder denne parken vil gje til både store og små i framtida. Heis flagget, gode sambygdingar, skriv Idrettslaget Ternen på Facebook.
Artikkelen held fram under annonsen.
Sidan mai i 2016 har idrettslaget arbeidd med ideen om ein fleirbrukspark i tilknyting til Skarveland skule. Ein park som både skulle by på fotballbane, kombinert tur-, sykkel- og rulleskiløype, klatre og leikepark.
– Torsdag 26. november vil bli ein merkedag i historia for bygdene våre. Etter fleire år med arbeid har vi fått på plass godkjent reguleringsplan for å kunna byggja parken vår. Ein park som skal kunna brukast både på dagtid og kveldstid av innbyggjarane våre, skriv Ternen.
Då saka var oppe i kommunestyret torsdag, vart den einstemmig vedteken og klubba gjennom.
– Gratulerer til Erslandsparken. Dette kjem til å bli eit fantastisk anlegg, sa ordførar Hans Inge Myrvold.