– Eg trur den indre kampen i Høgre har vore meir belastande enn dei politiske basketaka

Tankar om Høgre og Peder

Er det blitt hardare klima i Kvinnherad-politikken siste perioden? Nei, eg trur ikkje det. Peder kan tenkja tilbake på førre periode då han og Høgre sat i opposisjon. Var dei snille med posisjonen? Kven organiserte fakkeltok og stor ståhei om sjukeheimsmat og Dill? Jau, kampanjeapparatet til Høgre og Peder.

Artikkelen held fram under annonsen.

For dei som har følgt med i lokalpolitikken nokre tiår, så kjenner dei omgrepet indre og ytre luten. Det er det som kjem fram i denne saka òg, trur eg.

Eg har vanskeleg for å tru at det er dei to store sakene, rådmannssaka og Kvinnherad Energi, som har knekt Peder. Dei to sakene har vore opne saker med tydelege frontar. Ein reieleg politisk kamp, spør du meg, sjølv om eg er usamd med avgjerdene i begge sakene.

Nokon bør gå i seg sjølv, vart det uttala etter infoen frå Peder i formannskapet sist torsdag. Ja, det er eg samd med. Eg trur Høgre kan ha godt av å gå i seg sjølv. Eg trur det må ha vore ein tøff jobb å balansera indre/ytre interessene i denne perioden. I dei fleste vedtak peikar pila i favør Rosendal. Også i dei to tunge sakene, rådmannsaka og Kvinnherad Energi. BKK skal over Årsnes. Haugaland Kraft trekkjer Kvinnherad mot sør.

Årsnes er litt av kjernen i indre/ytre-spelet. Årsnes er samferdsleknutepunktet som styrkjer Rosendal og vender Kvinnherad mot Hardanger. Alle vegar fører ikkje lenger til Roma, nei, dei fører til Årsnes.

Sunnhordland-diagonalen vil venda heile Kvinnherad mot sør/nord-aksen E39, via Husnes. Det e fa’li, det! Kven kjempar for denne diagonalen? Husnes Vekst? Kvinnherad Næringsservice? Eg ser ingen utanom ein entusiastisk Håkon Røstbø. Men, så er eg ikkje på Facebook heller. Det er visst der det skjer.

Den indre kampen i Høgre har vore skadeleg, trur eg, både for Peder og partiet. Denne indre/ytre kampen har pågått i alle tider, i alle fall så lenge eg kan hugsa. Høgre og posisjonen har til fulle fått utteljing i inneverande periode med vedtak som peikar retning Rosendal. Det bør resten av Kvinnherad etterkvart få opp augo for, ikkje minst dei 400 underskriftene frå Omvikdalen, som kjenner pusten frå Skålagato i nakken.

Eg kan nemna nokre andre saker: Bogsnes, Aksen, Opsangervegen, Kvinnheradpakkane, rådmannssaka, Kvinnherad Energi med fleire.

…og ikkje til å snakka om Husnes idrettssenter og ny idrettshall. Det komplekset vil eg koma tilbake til i eit nytt innlegg.

Artikkelen held fram under annonsen.

Eg trur den indre kampen i Høgre har vore meir belastande for Peder enn dei opne politisk basketaka.

 

Av Svein Røyrvik

Røyrvikjo, måndag 11. juni 2019

 

[gravityform id="11" title="true" description="true"]