Edvard Hoem til biblioteket

Han har femti år bak seg som forfattar og kulturpersonlegdom. Måndag kjem Edvard Hoem til biblioteket på Husnes.

– Me på biblioteket gler oss stort til sjølvaste Edvard Hoem kjem til biblioteket på måndag 25. november. Det har vore stor interesse for hendinga, og vi trur det blir fullt på biblioteket denne kvelden, så vi oppfordrar publikum om å vere tidleg ute for å sikre seg plass, seier bibliotekleiar Trude Hege Bergesen.

Hoem debuterte i 1969, og har ein svært stor og allsidig litterær produksjon bak seg: dikt, roman, drama, biografi. I tillegg har han gjendikta fleire stykke av Shakespeare til norsk. Han var i ein periode teatersjef i Molde.

I seinare tid er det bøkene om utvandrarane i Hoem-slekta som har gjort han til ein av dei mest populære samtidsforfattarane i Noreg: Slåttekar i himmelen, Bror din på prærien, Land ingen har sett og Liv andre har levd. Dei inngår i eit stort krønikeverk som ein kan seie byrja med den sjølvbiografiske boka Heimlandet. Barndom (1985), og heldt fram med Mor og fars historie (2005) og Jordmor på jorda. Huset under Blåhammaren (2018).

– Edvard Hoem skal snakke om desse bøkene og alt arbeidet som ligg til grunn for å kunne skrive så truverdig om «liv andre har levd» som han har gjort, opplyser Bergesen.

Dette arrangementet er ein del av markeringa av Bokåret 2019 og er i samarbeid med Hordaland fylkeskommune. Arrangementet er gratis