Dronninga kjem til Guddal
Galleri G Guddal inviterer til utstillingsopning med heilt nye grafikk- og keramikkverk av dronning Sonja på laurdag, og kunstnaren vil sjølv vera til stades under opninga i Guddal.
– Det er ei stor ære for galleriet å ønskja velkomen til utstilling med H.M. Dronning Sonja sine heilt nye bilete og keramikk, seier Gøril Guddal i ei pressemelding.
Artikkelen held fram under annonsen.
Arbeida til dronninga vil fylla begge utstillingsromma i galleriet.
Dronning Sonja byrja forsiktig med utøvande kunst i Ørnulf Opdahl sitt atelier på Godøya i Ålesund for mange år sidan. I starten heldt ho på med akvarellmåling, men etter kvart som dette samarbeidet utvikla seg kom grafikken i fokus. I 2012 hadde dronninga, Opdahl og Kjell Nupen ei felles utstilling kalla «Tre landskaper», som mellom anna vart vist i Baroniet Rosendal. Inntekta frå denne utstillinga danna grunnlaget for opprettinga av The Queen Sonja Print Award, som er eit fond for unge utøvande kunstnarar. I 2016 opna dronninga og Magne Furuholmen ei utstilling der mange av dei grafiske arbeida var eit samarbeid i eitt og same bilete.
Utstillinga i Guddal vil bli opna med ord frå Knut Olav Åmås, som er direktør i Fritt Ord. Kari Malmanger vil syngja under opninga. Utstillinga til dronning Sonja skal stå i galleriet heile sommaren.