Dronninga i islandsk krim til biblioteket

Torsdag 7. februar står Island i fokus ved Kvinnherad bibliotek.

1. desember i 2018 markerte Island 100 år som suveren stat.

– Litt på overtid i høve jubileet har biblioteket invitert ein sentral islandsk kriminalforfattar til oss. I tillegg vert Karvel Strømme frå Fitjar med på arrangementet med eit kåseri han har kalla «Island, mitt land». Karvel Strømme har vore  reiseleiar på fleire turar til Island, og kjenner landet godt, skriv biblioteksjef Trude Hege Bergesen i ei pressemelding.

 

– Ikkje kosekrim

Yrsa Sigurðardóttir (f. 1963) er blitt kalla «Islands svar på Stieg Larsson», og med sin forkjærleik for overnaturlege fenomen har ho òg likskapstrekk med Johan Theorin. Yrsa er ein folkekjær islandsk krimforfattar, som skriv grøssarar som får kritikarane til å mista nattesøvnen. Sivilingeniøren frå sagaøya Island debuterte med ei barnebok i 1998. Etter fem barne- og ungdomsbøker kom den første spenningsromanen i serien om politijuristen Þóra Guðmundsdóttir i 2005.

– Det er ikkje direkte noko kosekrim Yrsa skriv. Ho er kjend for å koma med uvanlege drapsmetodar i romanane sine, og har påpeikt at kriminaliteten i røyndomen på Island er låg og drapa «kjedelege». Den intense spenninga er ofte krydra med samfunnskritikk. «Eg prøver å fortelja ei god drapshistorie, men vel gjerne ein underkategori som anoreksi eller alkoholisme.» Eller det kan handla om mobbing som i den nyaste norske omsetjinga, Syndsforlatelse (2018), melder Bergesen.

Thrilleren «Jeg vet hvem du er» blei nominert til Glassnøkkelen 2011, og er også filmatisert og har vore vist på norske kinoar.  Våren 2015 blei Sigurðardóttir tildelt den høgthengande britiske prisen Petrona Award for boka «Dødsskipet». Yrsa har skrive 10 krimromanar og er omsett til fleire enn 30 språk og haustar stadig strålande kritikkar. Ho bur i Reykjavik med familien sin.