Dokter Haugen-boka er utselt – kjem i nytt opplag

Per i dag er det ikkje fleire bøker om dokter Haugen på laget, det vil difor koma eit nytt opplag med mindre endringar og rettingar.

– Tilbakemeldingane er mange og gode, også frå lesarar som ikkje har opplevd Haugen. Vi er beint fram overvelda over den store interessa i marknaden, og er både glade og audmjuke over at så mange har bidrege med historier til boka, seier Thor Inge Døssland i boknemnda til ei pressemelding.

Såpass populær har boka vore at boknemnda, beståande av Døssland sjølv, Kristian Olav Bringedal og Kristian Hus, ikkje har eit einaste eksemplar att. Dei har difor bestemt seg for å køyra i gang med eit nytt opplag.

– Venteleg vil 2. opplaget bli ferdig i løpet av sommaren. I mellomtida blir det arbeidd med ei nettside om dokteren, der om lag 50 nye historier om han vil bli publiserte. Kjem det endå fleire historier inn, vil også desse bli publisert på nettstaden.