Dobbel frekvens på restavfall og henting av plastemballasje

Frå og med 9. april vert det innført ny renovasjonsordning i SIM-kommunane.

Det betyr at du må endra rutinane dine når det kjem til kva bosdunk du skal rulla på plass. For i den nye ordninga vert det tømming av restavfall og bioavfall annankvar veke, medan det kvar fjerde veke vert henting av papiravfall og plastemballasje.

– Endringa er at det vert dobbel tømming av restavfall. I motsetnad til no når det er restavfall ein gong i månaden, så vert det frå og med 9. april annankvar veke, seier plan, innkjøps- og kommunikasjonsansvarleg Janne Hillersøy i SIM.

I tillegg opnar SIM opp eit heilt nytt tilbod til sine kundar.

– Det vert henting av plastemballasje. Om du ikkje enno har fått, så vil du få ein sekk med posar levert på døra, den fyller du med rein og tørr plastemballasje og så kjem vi og hentar den kvar fjerde veke, seier Hillersøy.