Digg i galleriet

Søndag 12. november kjem forfattar Anders Totland til Galleri G Guddal. Der blir det fokus på kokeboka hans, «Digg».

Mari Mehl

Mari Mehl

mari@grenda.no

9 november, 2017

– Totland fer rundt som ein virvelvind og gjer stor suksess med bøkene sine for tida, heiter det i pressemeldinga frå galleriet.

Kafeen i Guddal testar ut oppskriftene i kokeboka denne søndagen – både suppe og kaker. Totland vil presentera boka si sjølv.

– Kva skal vi ha til middag på ein onsdag? Eller måndag? Det må sjølvsagt skje veldig fort… Ei enkel kake? Dessert som passar for sesongen? Anders Totland set fokus på den gode, enkle og sunne kvardagsmaten, skriv Gøril Guddal.

Forfattaren vil også presentera dei andre bøkene sine i galleriet.

– Det er kritikarroste bøker, alle saman. Han tør der andre kvir seg, og gjer det på ein aldeles strålande måte, meiner galleristen.

Rosendal Bokhandel sel bøker i galleriet denne dagen.

– Den som kjøper kokeboka «Digg» blir med i trekkinga av ein superpremie; kokken/forfattaren kjem heim til deg og lagar mat til 4 personar, fortel Gøril.

Gøril lovar dessutan at pianoet også blir teke i bruk denne søndagen.