Dette var dei mest populære namna i 2020

Jentenamn som sluttar på «a» og bibelske gutenamn er framleis i vinden.

Nora og Jakob var dei mest populære namna for barn som vart fødde i 2020. Etter Nora så følgjer Emma og Ella.

– Nora er ein kortform for Eleonore, og dukka opp i kjølevatnet av Ibsens «Et dukkehjem». Nora var lite brukt mellom 1940 og 1980, men så kom det eit oppsving saman med mange andre korte jentenamn som sluttar på «a», fortel seniorrådgjevar Jørgen Ouren i SSB i ei pressemelding.

Nora toppa også namnelista i 2012 og 2014, og kom på andreplass i 2019. Det gjer det til det tredje mest brukte jentenamnet etter tusenårsskiftet, etter Emma og Sara.

At jentenamna sluttar på «a» er ein trend. Faktisk fekk 54 prosent av alle jentene som vart fødd i 2020 eit namn som slutta på den første bokstaven i alfabetet. Til samanlikning viser Statistisk sentralbyrå at den delen var nede i 12,5 prosent tilbake i 1947.

 

Bibelnamn

På gutesida var det Jakob eller Jacob som trona øvst på popularitetslista. Namnet kom inn på topp 10-lista tilbake i 2013, og har gjekk sigrande ut av popularitetskonkurransen både i 2017, 2019 og 2020.

– Jakob er eit hebraisk namn av ukjend opphav, og er eit typisk bibelnamn. Når vi finner Noah på tredje, Filip på femte og Lucas på sjuande, ser vi at bølga med bibelske gutenamn lev i beste velgåande. 1,5 prosent av nyfødde fekk slike namn rundt 1950, og i 2006 var delen på 22,5 prosent, seier Ouren i ei pressemelding.

 

Topp 10 jentenamn i 2020:

1. Nora/Norah

2. Emma

3. Ella

4. Maja/Maia/Maya

5. Olivia

6. Emilie

7. Sofie/Sophie

8. Leah/Lea

9. Sofia/Sophia

10. Ingrid

Topp 10 gutenamn i 2020:

1. Jakob/Jacob

2. Emil

3. Noah/Noa

4. Oliver

5. Filip/Fillip/Philip/Phillip

6. William

7. Lucas/Lukas

8. Liam

9. Henrik

10. Oskar/Oscar