– Det har blitt litt lite søvn dei siste dagane

Med 14,7 millionar kroner inn på konto, har Kvinnherad sin siste Lotto-millionær fått kvardagen snudd på hovudet. Men det betyr ikkje at han sluttar i jobben sin av den grunn.

– Det har medført litt lite søvn dei siste dagane. Eg ligg oppe om natta og tenkjer på kva eg skal bruka pengane på. Det opnar seg fleire moglegheiter for meg no. Med meir økonomisk fridom slepp eg å tenka like mykje på pengar som før, men eg kjem likevel til å halda fram i jobben, og turar elles på som vanleg, seier den ferske Lotto-millionæren.

Den ferske millionæren ynskjer å vera anonym, og Grenda har difor gått via Norsk Tipping for å få ein prat med han. Eit av spørsmåla han fekk var kva draumar han no kan oppfylla, som han ikkje kunne før dei sju rette tala tikka inn laurdags kveld.

– Eg kan reisa meir, leggja meir pengar i bustad og bil, i tillegg kan eg sørga for at familien min har det godt. Dei får nok også nyta litt av denne premien, seier han.

Og at han no innehar Kvinnherad-rekorden på størst Lotto-gevinst, det lev han veldig fint med.

– Det er berre heilt topp, seier mannen som framleis vil halda det hemmeleg at det var nettopp han som vann.