Dette laget har ikkje tapt eit einaste poeng denne sesongen. Sånt vert det sjølvsagt seriegull av. (Arkivfoto)

Desse Trio-jentene vart seriemeister

Det vart både dramatisk og spanande då Trio J15 møtte Vedavåg/Skudenes til seriefinale på Kvednabekkjen søndag kveld.

For etter ein lang sesong stod både Trio og motstandar Vedavåg/Skudenes med full pott i 1. divisjon i Rogaland. Det var før laga møttest til dyst på Kvednabekkjen.

Artikkelen held fram under annonsen.

Trio-jentene gjekk ut i eit lågt press i fyrste omgang og gjorde det vanskeleg for gjestane frå Karmøy. Også offensivt fungerte det bra for raudtrøyene til Per Einar Gjerding, og allereie etter eit kvarter sørga Julie Ersland for full jubel på Kvednabekkjen.

Eit kvarter seinare stilna jubelen då Vedavåg/Karmøy fortent fekk si utlikning. Med det var laga like langt etter halvspelt seriefinale.

For Trio betydde det at dei måtte ut å angripa 2. omgang sidan Vedavåg-jentene stod oppført med betre målskilnad før siste seriekamp.

– Men vi held på med lågt press også i andre omgang, samstundes overtek vi kampen meir og meir, skriv trenartrioen Kristine E. Medhaug, Per Einar Gjerding og Stig Rusten.

 

Jubla med pizza

Utover i omgangen tok Trio større risiko i angrep og sendte fleire jenter fram. Det betalte seg raskt i form av nok ei scoring frå Julie Ersland.

Og sjølv om Trio kunne og burde ha scora eit par til, var 2-1 nok til å henta heime tittelen i 1. divisjon i Rogaland 2019.

Artikkelen held fram under annonsen.

– Jubelen stod i taket då dommaren blåste i fløyta. Serievinnar med full pott, for nokon jenter! Skriv trenarane på nettstaden til Trio.

Ligagullet vart feira på Pizzabakeren, og vil bli ytterlegare feira på Triohuset i desember.