Dei eldste på Nordsida får tilbod om vaksinering på Hatlestrand
Kvinnherad kommune skal snart i gang med massevaksinasjon av dei eldste innbyggjarane i kommunen.
Dei to føregåande vekene har Kvinnherad kommune vaksinert dei faste bebuarane på aldersheimane. Difor planlegg dei no massevaksinasjon av kommunens eldste innbyggjarar.
Artikkelen held fram under annonsen.
– Kommunen vil først kontakta, per telefon, dei over 85 år, deretter dei over 75 år. Så dei over 65 år og dei som er i risikogrupper i alderen 18 til 64 år, skriv kommunen på sine heimesider.
I utgangspunktet er Kulturhuset Husnes og Rosendal samfunnshus dei to oppsette vaksinasjonsstadane i Kvinnherad. Ei avgjerd som skapte reaksjonar på Hatlestrand og Ølve som følgje av at fleire ville få problem med å koma seg til Rosendal og samstundes følgja smittevernreglane.
No gjer kommunen noko med dette.
– På Hatlestrand og Ølve vil dei eldste få tilbod om vaksinering på Hatlestrand helsesenter, skriv kommunen og held fram:
– Vi veit ikkje dato endå, men vil ta kontakt så snart vi har ein konkret time å tilby for dei ulike gruppene. For dei under 65 år vil vi koma attende med informasjon om korleis dei skal gå fram i høve til vaksinering, skriv kommunen.