– Dårleg politisk handverk

Det var dårleg nytt for kyrkja i Kvinnherad at fleirtalet i kommunestyret har funne ut at dei kan klare seg med kr. 300.000,- mindre enn det administrasjonen hadde lagd opp til i sitt budsjett for neste år. Ikkje minst fordi kyrkja allereie hadde skore ned sine utgifter med ein halv million kroner i sitt budsjettarbeid. Men meir om det litt seinare.

Det er ikkje alle som er klar over, når dei les om kyrkja i kommunen sitt budsjett, at det ikkje berre er pengar til kyrkja det her er snakk om, fordi Fellesrådet m.a. har teke på seg ansvar for å drifte alle gravplassane i kommunen. Det er ein svær jobb som tek brorparten av midlane, men òg ein jobb som Fellesrådet har fått mykje skryt for.

Tilskot frå Kvinnherad kommune til Fellesrådet har ikkje auka mykje i kroner dei siste åra. I 2015 fekk Fellesrådet kr. 9.740.000,- og i år kr. 10.002.000,-, så her er det eigentleg redusert tilskot om ein reknar inn pris- og lønsauke for desse åra.

Fellesrådet har gjeve uttrykk for at dei forstår kommunen sin utfordrande økonomi, og vil vera med på å finne løysingar på billegare drift. Kyrkjekontoret hadde tett dialog med administrasjonen i kommunen då budsjett for kyrkja vart laga. Her vart det vist til at det vart funne rom for å redusera utgifter med over ein halv million kroner, mest ved å ikkje tilsetja folk i stillingar som vert ledige nå ved årsskifte. Men fordi andre inntekter til Fellesrådet går ned med nesten ein million kroner frå 2020 til 2021, måtte Fellesrådet be om at driftstilskotet vart auka frå kr. 10.002.000,- til kr. 10.395.000,-. Dei andre inntektene det her er snakk om, er m.a. festeavgift for graver, som går ned med ein halv million mellom desse åra. I 2021 er det enkelt og greitt færre festeavgifter som er til forfall enn det var i år.

Kyrkjekontoret var stolt over å kunne leggja fram eit forsvarleg budsjett, så difor var det eit slag i ansiktet å sjå at fleirtalet vil redusera tilskotet, utan så mykje som å høyra med kyrkja om det er høve til det, eller informere om at dette kom dei til å gjera. Dette er dårleg politisk handverk.

Fleirtalet set kyrkja i ein vanskeleg situasjon. Skal dei foreslå at kommunestyret doblar festeavgifta, eller skal dei ta vekk ordninga med at Fellesrådet dekker utgifter ved kremasjon? Dette vert kalla å senda rekninga til innbyggjarane, og eg veit ikkje om SV/Raudt, AP og SP likar det så godt. Eg vil minne om at ein stor del av dei som betalar festeavgift er godt oppe i åra.

Eller skal halvparten av dei tolv kyrkjene våre stengjast? Det er ikkje Fellesrådet som har valt å ha så mange kyrkjer. Med halvparten av kyrkjene stengde vil ikkje alle innbyggjarar få dåp, konfirmasjon, vigsel eller gravferd i si heimebygd. Men det er heller ikkje nok til å spare tre hundre tusen kroner. I tillegg må då kanskje kyrkjegardsarbeidarane slutte å kantslå rundt gravminna og la det gå lenger tid mellom kvar slått for å sleppe utgifter til vikarar om sommaren.

Eg seier at dette er dårleg politisk handverk, for dei som foreslår dette burde sett seg grundigare inn i kyrkja sin økonomi og ikkje berre tatt opp ostehøvelen. Men det er framleis rikeleg med tid til å rette opp i dette, og det trur eg Gunnar, Hege og Hilde vil gjera.

 

Av: Erling Niclasen (H)

Tidlegare kyrkjeverje