Ingebjørg Eik og Preben Dale skal begge opptre saman med Husnes Musikklag 7. mars. (Arkivfoto)

Byr på heilaftan med storbandmusikk

Ingebjørg Eik Band og Preben Dale inviterer til ein heilaftan med eit vrimmel av kjende melodiar når dei står på scenen i Festsalen saman med Husnes Musikklag 7. mars.

Ein kan venta seg alt frå Stevie Wonder og Pink Floyd til filmmusikk frå James Bond når Ingebjørg Eik Band, Preben Dale og Husnes Musikklag går saman om ein musikalsk heilaftan i Festsalen i Kulturhuset Husnes den fyrste laurdagen i mars.

Artikkelen held fram under annonsen.

– Det blir stor musikalsk variasjon med pop, rock, jazz og funk. Så dette vil nok passa for alle som er glade i musikk, smiler Ingebjørg Eik.

Ho og bandet hennar vart kontakta av Husnes Musikklag i fjor haust, og fekk då spørsmål om dei kunne tenka seg å bli med på ein storkonsert med dei. Det takka bandet sjølvsagt ja til, og laurdag 7. mars er dei, Husnes Musikklag og Preben Dale klare til å gi Kvinnherad-publikummet ein storslagen festkveld i vassekta storbandstil på Husnes.

– Eg trur det skal bli kjekt, eg gler meg i alle fall mykje. Det skal bli gøy å synga James Bond-låtar med eit storband i ryggen, seier Ingebjørg og legg til:

– Vi håpar at dette er noko folk vil ta turen på, så vert det musikk på popanlegget etter konserten og utover nattetimane.

Både ho og utflytta valebu Preben Dale, blant anna kjent frå Pink Floyd-konsertane i Kulturhuset Husnes og bandet Among Colors, skal syngja saman akkompagnert av Husnes Musikklag i flotte arrangement laga av musikklaget sin eigen dirigent Clive Anderson. I tillegg blir Ingebjørg Eik, som tidlegare har delt scene med kjende namn som BigBang og Eva Weel Skram, å sjå saman med Husnes Funk Orchestra.