Motsegn og innspel til reguleringsplanar på Seimsfoss og i Dimmelsvik

Begge planområda ligg under marin grense, og i slike område kan ein ikkje utelukka førekomstar av kvikkleire, skriv NVE, og tilrår i begge sakene at NVE sin rettleiar «Sikkerhet mot kvikkleireskred» må følgjast. På Seimsfoss vert det peika på at grunntilhøva under den eksisterande fyllinga ikkje er kjende, noko som er viktig å avklare då det er lagt opp til vidare utfylling i sjøen.

I planen for Seimsfoss næringspark er det fleire punkt som vert adressert. NVE meiner mellom anna at det manglar tilstrekkelege utgreiingar om konsekvensar for flaum- og erosjonsfare. Dette må bli gjort, med ei mogleg følgje at planen må bli justert.

Dei viser også til at planen opnar for tiltak i vassdrag utan at trongen for dette er dokumentert. Her er ikkje tiltak konkretisert eller konsekvensane for ålmenne interesser i vassdraget utgreidd. Mellom anna er NVE sterkt kritiske til at det blir opna for inngrep i den grøne sona langs Guddalselva, og tilrår sterkt at all teknisk infrastruktur vert etablert innanfor næringsområdet.

Flaumsikringstiltak må også bli konkretisert av kommunen. Her er NVE særleg kritiske til at planen som no ligg til grunn, i følgje ein tidlegare utarbeidd rapport frå Norconsult, kan føre til auka flaumfare sør for elva. Ein plan som ikkje har vurdert konsekvensane for ein slik situasjonen finn NVE «uakseptabel». Dersom desse tiltaka vert akseptert og gjennomført, vil grunnlaget for motsegna fella bort. Dette gjeld også for punktet om kvikkleire, ved at skredfaren vert utgreidd og Kvinnherad kommune innarbeider konklusjonane frå utgreiinga i planen.

I samband med Næringsområde Sandviklio – Dimmelsvik sin reguleringsplan, som er i oppstartsfasen, peikar NVE på at området er ras og skredutsett, særleg knytt til Oksarelva og austover i lia. Til desse områda må det verta knytt føresegner som sikrar tilstrekkeleg tryggleik før utbygging kan finna stad.

Nytt selskap har store planar i Dimmelsvik