Gutane sleppte jubelen laus etter kampslutt. (Foto: Dag Ivar Eide).

Bronse til Halsnøy-gutane!

OPPDATERT: - Det tøffaste eg har vore med på, seier lagleiar Dag Ivar Eide etter at Halsnøy G14 sikra bronsemedaljen i ein høgdramatisk kamp fredag føremiddag.

I bronsefinalen i G14 (7-ar fotball) møtte blåtrøyene Frei. Motstandaren tok leiinga, men Heike Herland Eide utlikna til 1-1 rett etterpå. Det resultatet stod seg både til pause og til full tid, trass i at begge laga fekk store sjansar. To gonger trefte ballen tverrliggjaren.

Dermed var det klart for 2x5 minuttar ekstraomgangar med golden goal. Etter to minuttar fyrte Bjørn Einar Hvidevold avgårde eit skot som fauk inn i nota. Til stor jubel blant Halsnøy-fansen på Ekebergsletta!

Artikkelen held fram under annonsen.

Halsnøy IL har dermed sikra seg medalje i A-sluttspelet i Norway Cup for fyrste gong sidan 1998. Vi gratulerer klubben, spelarane og lagleiarane Arnljot Hvidevold, Dag Ivar Eide, Verner Fjelland og Glen Fredriksen.

- Dette var svære greier, jublar Dag Ivar Eide medan han ventar på at laget skal ut på banen igjen for å motta premiane.

- Heilt forferdeleg, heilt grusamt å sjå på. Dette er det tøffaste eg har vore med på. Men heilt fantastisk at vi vann, legg han til.

Eide reknar med det vert ei form for feiring, men no skal gutane rett bort for å sjå jentelaget sin bronsefinale.