Bratland avlyser i Baroniet
Ingebjørg Bratland skulle spelt konsert i Baroniet i kveld, men eit kragebeinsbrot set ein stoppar for det. No steppar Herborg Kråkevik inn.
Søndag tråkka Ingebjørg Bratland over, sklei og fall slik at ho knekte kragebeinet. Med det går konsertar både i Rosendal og Kristiansand fløyten.
Artikkelen held fram under annonsen.
– Ho vil bli operert i dag eller i morgon. Ho beklagar djupt å måtta kansellera desse konsertane, men håpar at ho kan lansera nye datoar i løpet av kort tid, skriv artisten sitt management i ei melding til Baroniet.
Baroniet på si side ynskjer artisten god betring, og gler seg samstundes over at Herborg Kråkevik, på så kort varsel kunne steppa inn.
– Det gler oss stort at Herborg Kråkevik har sagt ja til å halda konsert saman med sin dyktige pianist Helge Lilletvedt i Riddersalen tysdag kveld, skriv Baroniet i ei pressemelding.
Konserten med Ingebjørg Bratland var utselt for ei god stund sidan. For dei mange som sit med billett vert det mogleg å behalda dei og heller gå på Herborg Kråkevik, byta til ein annan ledig konsert i Baroniet eller å få pengane tilbake.