Bokbåten jubilerer og kjem til Kvinnherad

Marius Tveit Nissestad

Marius Tveit Nissestad

marius@grenda.no

Publisert: 8. november 2019, 10:00

Tysdag la den no 60 år gamle bokbåten ut på nok ein turné i Hordaland. Dei neste tre vekene skal «Epos» legga til kai 54 stadar i fylket.

Årets haustturne går først mot sør, og starta på Strøno 5. november, og sluttar av i Kolbeinsvik 15. november. I mellom desse to stoppestadane skal «Epos» gleda både små og store barn på så mange som 52 stadar i fylket. Og sjølvsagt kjem han til Kvinnherad.

Faktisk er Ølve ein av dei fyrste stoppestadane for den jubilerande bokbåten. Her låg han til kai torsdag i veka som var. Vidare skal han innom Varaldsøy måndag kveld, før Snilstveitøy står for tur 14. november.

Med seg på årets turné har dei fått Nina Næsheim, som igjen har med seg eit magisk skrin som ho arva av morfaren sin. Han var sjømann og reiste rundt på dei sju hav. Det gamle skrinet inneheld små ting med eventyr frå fjernt og nært, og i framsyninga får publikum både høyra eventyr og forteljingar frå røynda. Nina har også med seg gitaren og inviterer publikum om bord med til å syngja.