Bli med på heimeleir med speidarane
Speidarane i Rosendal speidargruppe oppmodar alle til å bruke påskeveka til overnatting i friluft. For den som ikkje har høve til å sova ute, er det berre å rigga seg til med sovepose i stova.
I påskeveka er det mange som kjem til å vera heime. Speidarane oppmodar til heimeleir, også for dei som ikkje er speidarar.
Artikkelen held fram under annonsen.
– Det er en fin aktivitet som passar for alle. Bruk nærskogen, hagen eller balkongen. Onsdag 8. april er det superfullmåne, det betyr at fullmånen lyser endå sterkare enn elles, så viss himmelen er klår da, blir det så lyst at du mest ikkje treng lykt, foreslår Gunn Kleppe frå Rosendal Speidargruppe.
Den som ikkje kan eller vil leggja seg ut, kan ha leir i stova.
– Spisebordet kan bli ei fin hytte for små eventyrarar, meiner Kleppe.
Heimeleirmerket er nettopp lansert, og alle som blir med på overnatting i sovepose i påskeferien, åleine eller saman med familien, gjer seg fortent til merket. Ein tar kontakt med Gunn i Rosendal Speidargruppe innan 15. april for å få merket gratis.