«Bleikfeite hyser»

Når katten er vekke, må vi nytta sjansen til å prenta eit bilete av redaktøren og dagleg leiar med ei slik sjarmerande overskrift. Rett nok er det ikkje dei som er hysene, derimot eit lag i Grenda-ligaen i Fantasy-fotball.

 

Det nærmar seg seriestart engelsk fotball. Fredag 9. august går Liverpool og Norwich på banen for å sparka i gang den nye sesongen. Det betyr at også den nystarta Grenda-ligaen i Fantasy-fotball er premiereklar. Allereie har meir enn 100 fotballinteresserte kvinnheringar meldt seg på. Vi reknar med det vil strøyma på med fleire lag den siste veka.

Nokon vel seg seriøse namn på laget sitt, andre går for humor. Prisen for beste namn så langt må gå til Fabian Ruud frå Arnavik, som stiller med «Bleikfeite hyser». Monika Feet set sin lit til «Happy Feet», medan Liv Torunn Tjelmeland har stor tru på «Såpebobleboogie». Anders Saghaug skal ha kreditt for sin sjølvironiske «Unarmed Army». Om Leiv Kristian Skåla er like ironisk, veit vi ikkje, men han kallar laget sitt «Best uten ball».

 

Til England

Rolf Vidar Grønstøl Hansen har ubeskjedent nok døypt gjengen sin for «Kongelaget». Oddbjørn Enæs dundrar til med «Manchester United». Om det vil bringa lukke, gjenstår å sjå. Det er heller ingen tvil om kva engelske lag Jarle Hjelmeland Vevik og Anders Næs er tilhengarar av. Deira håpefulle heiter nemleg «Leeds going up» og «Vangsvegen Gooners».

Vi kan elles nemna at varaordførar Hans Inge Myrvold har meldt seg på. Sjå opp for hans «Myrvold Utd».

Vil du vera med og kjempa om fyrstepremien, ein fotballtur til England for to, så må du laga deg ditt eige Fantasy-lag. Innmelding i Grenda-ligaen skjer med kode pj1dpy.