Tommel opp til friluftsskule
DNT Bergen og Hordaland arrangerer friluftsskule i Vikjo denne veka. Her har 25 barn i 9-13-årsalderen samla seg for å læra om friluftsliv og samhald.
Publisert
Sist oppdatert
Måndag føremiddag var ungane samla på Holmen i Vikjo for å bli kjent, bada og ha mykje lått og løye. Dei fekk òg læra om kart og kompass før ei skattejakt gjekk av stabelen.
– I dag har vi hatt bli kjent-leiker og bada, seier Vegard Helland (12) frå Husnes. Han og kameraten Andreas Haugen (12) har gledd seg til opplegget denne veka.
Annonse
– Eg gler meg aller mest til å fiska, det er så gøy og eg får alltid fisk, seier Vegard.
Gøy i naturen
Det er fem turleiarar i 20-åra som leier friluftsskulen i år. Dei er alle medlemmer i DNT, og har stor tru på naturen som ein koseleg og terapeutisk opphaldsplass.
– Det er viktig for oss å ha fokus på at alle stiller likt uansett kven dei er eller kor dei kjem ifrå. Samhald står sterkt i fokus når vi legg opp dagane, og sjølvsagt at ein skal ha det gøy i naturen, seier Barne- og ungdomsarbeidar Hildegunn Samnøy frå Bergen. Ho er hovudleiar ved friluftsskulen i Vikjo.
Annonse
– Vi har 25 barn frå forskjellige plassar her, men det skal ikkje bety noko denne veka, seier ho, før ho legg til:
– Vi skal læra litt om kart og kompass, om turvett generelt, og elles berre kosa oss ilag.
Variert og kjekt opplegg
Dette er eit opplegg som DNT har arrangert fleire gongar, og mange av ungane kjem igjen år etter år. Det er ope for alle barn alderen 9-13, og dei fleste ungane er frå eller har tilknyting til Kvinnherad. Planen for veka er variert og kjekk for ungane. Dei skal i steinparken, ha rebus og leiker, gå tur og padla kajakk, før veka blir avslutta med overnatting i hengekøyer på Holmen natt til fredag.
