Onsdag inviterte ungdomsskuleelvane ved Øyatun til ei heilt spesiell juleframsyning. Dei ville feira at skulen deira var heile 60 år i år.

Suksess for tradisjonsrik juleframsyning - sjå bildeserie her!

Onsdag kveld var det duka for tradisjonsrik juleframsyning i Halsnøy Kulturhus, arrangert av Øyatun skule. Samstundes markerte dei skulen sitt 60-årsjubileum.

Journalist
Publisert Sist oppdatert

Elevar og lærarar ved ungdomsskulen på Halsnøy kunne etter om lag 1,5 veke med intens jobbing, invitera til show. Det blei det 21. året med juleframsyning.

Kvelden blei leia av 10. trinn-elevane Mildrid Fjelland Håvik, Rikke Sjo og Lilly-Anna Berge Fosse, som hadde fått rolla som konferansierar. Dei gjorde ein strålande jobb, og improviserte med kjappe spøkar mellom innslaga dersom riggejobben drog ut.

– Du har så mange morosame kommentarar, sa Mildrid til Lilly-Anna.

– Ja, det blir slik når ein er fødd på ei lita øy. Då har ein god tid til å tenka, svara Fjelbergbuen raskt.

Spesielt tok det tid før koret Gullgutane var klare for si opptreden. Då kom det kjapt frå Lilly-Anna:

– Kjem dei ikkje snart må me begynna å kalla dei for Sølvgutane.

60 år med Øyatun

I år var framsyninga også litt ekstra spesiell, ettersom Øyatun, som i si tid var den første ungdomsskulen i Sunnhordland, faktisk fylte 60 år i år.

– Sidan vi ikkje har fått anledning til å feira jubileumet på anna vis, tenkte vi at det var flott å ha dette som ein raud tråd i juleframsyninga vår i år, kunne lærar Mette Hvidevold fortelja til Grenda.

– Det er kjekt at vi har klart å halda fast ved denne tradisjonen, som blei starta tilbake i 2003 av dåverande rektor Hjørdis Østerbø. Alle elevane og alle lærarane har hatt ei rolle i produksjonen. Det er fint at vi er ein så liten skule at vi kan arbeida med slike store prosjekt på tvers av klassetrinna, la ho til.

Flotte innslag

Gjengen skulle ha to framsyningar iløpet av kvelden, og første framsyning var til fullsett sal.

Kvelden opna med song, og vidare fekk publikum servert både dansenummer, humoristiske sketsjar og trommesolo og band-musikk, for å nemna noko.

I tillegg var det også intervju med tidlegare lærar Bente Tveit Sjo, der ho fekk prata om tida hennar som lærar. Ho hadde vore ved Øyatun i heile 40 år, og kunne mellom anna fortelja at ting hadde endra seg i skuleverket frå då til no.

– Mellom anna var elevane meir beskjedne før. I dag er dei meir opne, og ønskjer å diskutera alle moglege ting, smilte ho.

Her kan du sjå bilde frå framsyninga.

Pensjonert lærar Bente Tveit Sjo blei intervjua på scena av dei tre programleiarane Mildrid Fjelland Håvik, Rikke Sjo og Lilly-Anna Berge Fosse.
Bård Øvsthus leia gutekoret Gullgutane, og han inviterte til konkurranse mellom koret og publikum med songen «Drunken Sailor», og det var om og gjera å synga høgast.
Gullgutane imponerte publikum. Dei hadde i år dessutan 10-års jubileum.
Innslaget «der ingen skulle tru at nokon kunne bu» fekk publikum til å skrattle. Eirik Johan Arnevik spelte bonden Leslie, som kunne fortelja at: «vi har utedass, men vi pissar berre på straumgjerdet».
Det blei mykje hopp og sprett då gutane skulle dansa.
Trioen «Små menn» bestod av (f.v.) Aksel Hanstvedt Tofte, Eirik Johan Arnevik og Jonathan Reigstad. Då dei dansa til fleire kjente songar blei det hysterisk stemning i salen.
Jacoba Størksen og Hannah Medhus framførte nydeleg song.
Det blei også fart då jentegruppa «Boss Ladies» kom på scena.
Litt synkronsvømming vart det også tid til under juleshowet til Øyatun.
Det blei eit litt anna tempo på juleframsyninga då James Theodor Fjelland hadde trommesolo til hard rock.
9. klasse var band då songen «Hvilepuls» skulle framførast. Songen, som er på god veg til å bli ei landeplage, er ein parodi på korleis tidlegare Farmen-programleiar Gaute Grøtta Grav framstod på TV-skjermen under 71 grader nord denne hausten.
Programleiar-trioen Lilly-Anna Berge Fosse, Mildrid Fjelland Håvik og Rikke Sjo gjorde ein strålande jobb.
9. trinn viste flott dans.
På storskjermen blei det òg vist nokre filmsnuttar som elevane hadde laga. Mellom anna var det eit God Morgen Norge-innslag, der reportaren hadde litt problem med å forstå seg på «generasjon krenka». Dei meinte nemleg at lærarane gjorde akkurat som dei ville, og at siste dråpe var då læraren forlanga at dei skulle ha ein prøve om ting dei hadde lært. «Læraren må forstå at eit nei er eit nei», forklarte ein krenka elev under intervjuet.
Det blei fleire kjekke danseinnslag, her ei fargerik treningsgruppe.
Med 60-års jubileum som ein raud tråd under framsyninga, måtte det sjølvsagt mimrast litt. Det blei vist gamle bilde av tidlegare elevar på storskjermen. Nokre foreldre og nokre lærarar var å finna på Øyatun sin «Wall of fame».
Ikkje alle hadde fått med seg at det var juleshow. Mildrid Fjelland Håvik trudde det var skidag dei skulle ha.
Jentene på 10. trinn gjenskapte den ikoniske dansen frå filmen Mean Girls.
Kc Ronda var blant dei som gjenskapte den ikoniske dansen til songen Rockin' Around the Christmas Tree.
Rektor Hege Mehammer Tofte takka flinke elevar og lærarar for jobben dei hadde gjort.
Kjartan Hansen hadde ansvar for lyd og lys, saman med lærar Mette Hvidevold.
Kvelden blei avslutta med allsong.
biletseriar kultur biletseriar
Powered by Labrador CMS