Søv under open himmel kvar fredag

Møter ein på eit knippe sjarmtroll frå Rosendal FUS barnehage rundt lunsjtid ein fredag, er det godt mogleg dei har hengekøyer og bokstavkjeks i sekken. Likeins Lars Monsen søv også denne gjengen best under open himmel.

To- og tre-åringane på Samslåtto, altså dei eldste ungane på småbarnsavdelinga, ser fram til turane med hengekøye. Kvar fredag blir desse ungane delt i tre grupper, som rullerer på å gå tur, kreative sprell i barnehagen eller å vera på ein lengre tur med kvil i hengekøye.

Tett i tett

Det er Reidunn Seim Steffensen og Sunniva Tveito som er ansvarlege for sistnemnde, og dei slår såleis lett opp køyer og tarp.

– Vi byrja med desse turane i haust, og har vore her i Omshagen, på Hestasletto, i Baronihagen og på Bjørke. Ungane gler seg til desse turane og spør «kan vi legga oss no?», fortel Reidunn.

Ho har nettopp fått fire av seks barn til å sove. Dei ligg inntulla i tepper, anføtes to og to i kvar. Nokre gonger ligg dei tre ungar i ei køye, utan at det nokon gong har vore eit problem.

Kvardagsmagi

Sunniva har med seg Ivar og Johanna. Dei skal ikkje kvila, og nyttar tida til å leite etter pinnar. Desse byggjer dei hus og bål med, øver seg på å knekke og brukar dei til å pirke borti mose og lauv.

– Vi har funne små pinnar og store pinnar, men kva var det vi fann på vegen bort hit? seier ho og rettar spørsmålet til ungane. Ivar svarar nesten lydlaust, og Sunniva røper kva dei fann:

– Ein daud frosk!

Tidlegare har dei sett ein daud fugl. Men denne dagen er det pinnar som gjeld. Og bokstavkjeks. Dei har også med seg varm saft og kakao.

– Me er jo på tur! smiler Reidunn og legg til at desse fredagane er med på å legge eit grunnlag for turglede og kvardagsmagi.

Johanna og Ivar byrjar å synge medan dei sit og plukkar barken av ein pinne. August vaknar frå den gode kvilen, og blir godt teken hand om og tulla ekstra godt inn i eit teppe.

Det er gryande liv i leiren; Det gode liv i Omshagen.