85 deltok på fotballskule

I helga var det duka for fotballskule i Rosendal. 85 deltakarar brukte to dagar ilag med trenarar frå Viking FK.

Grunna vêret måtte dei flytta seg inn i Husneshallen på laurdag, men sundag var dei utandørs på kunstgrasbanen i Rosendal.

– Å flytta innandørs var den beste løysninga med all vinden, men vi er glade for å vera ute på full bane igjen i dag, sa Svein Helge Liknes frå Viking sundag ettermiddag.

Ilag med Anton Sunberg og Øystein Breland har han trent spelarar frå Rosendal, Odda, Trio, Uskedalen og Halsnøy denne helga.

– Eg er veldig imponert over nivået til deltakarane, og ikkje minst imponert over at det er så mange jenter med, seier Sunberg, og legg til;

– Ikkje minst er det magisk vakkert her, dette er noko anna enn dei banene eg er vane med i Stockholm og Uppsala, fortel svensken Sunberg.

Dei 85 deltakarne var fordelt over to grupper som hadde kvar sin treningstid. Då Grenda er innom er det dei i 11-13års alderen som er på banen.

– Både jenter og gutar har vore veldig gira, og det har vore veldig fine dagar, fortel leiar i fotballgruppa til Rosendal Turnlag Reinhard Lund-Mikkelson.