Plenty nøgd!
Laurdag ettermiddag inviterte Valen Ranch til «Rust på Ranchen». Her var alle doningar velkomne, og både to- og firhjulingar dukka opp. Fantastisk flott vêr, ein duft av vaflar og «skulle plukka plommer i Hardanger» over anlegget var det som møtte Grenda på Valen denne laurdagen.
Publisert
Sist oppdatert
– Det er veldig kjekt å sjå så masse løgne folk på ein gong, sa Ståle Eskeland då han ønskte velkommen.
– Ja, då føler du deg ikkje så åleine!, kom det frå publikum.
Annonse
Samhald i miljøet
Samhald verkar vera eit ord dei fleste Grenda snakkar med trekk fram som det kjekkaste med veteranbiltreff. Egil Anderssen frå Stord tok turen over fjorden for å vera med. Han har kjent Ståle i mange år, og likar seg godt på Valen.
– Eg er no her mest for det sosiale, og så er det grådig kjekt å sjå på andre sine køyretøy, seier han og legg til;
– Det å ha ei felles interesse gjer jo at ein blir godt kjent med folk, fordi ein ofte er på treff og liknande ilag. Det er ein veldig sosial gjeng, både dei med bilar og oss med motorsykkel.
Annonse
Bobler og Brus
Nord Rogaland VW Klubb var òg til stades. Sju morosame karar hadde tatt turen frå Haugalandet for å sleppa å jobba med alt dei skulle gjort om dei var heime.
– Og så er det jo sånn at dei som ikkje blir med, blir snakka om. Så det er om å gjere å vera med, seier Steinar Øyvik.
Gjengen frå Rogaland har vore i Kvinnherad fleire gonger før, og likar både turen opp og å køyra rundt i kommunen.
– Vi reiser opp hit fordi her er det ingen som kjenner oss, seier Øyvik.
– Men no kjem dykk jo kanskje i avisa, det er ikkje så inkognito?
Annonse
– Nei, så du må ta slik ein svart strek over augene på meg, seier Tore Kirketeig, som har svarte solbriller på seg. Bladfyken slepp dermed å redigera biletet.
Freistar til gjentaking
Ståle Eskeland var strålande nøgd med oppmøtet. Det fine vêret samla ein haug med folk og om lag 50 flotte bilar hadde vore innom då Grenda var på besøk.
– Eg er plenty nøgd eg! Det er heilt fantastisk at så mange tek turen. Det er jo berre pop-up i dag, så ingen treng stå her heile dagen, men det er veldig kjekt at dei stikk innom. Dette blir ikkje det siste treffet, eg tenkjer nok at vi må har minst eitt i året. Vi har berre fått gode tilbakemeldingar når vi har hatt arrangement før, så eg freistar seie at dette er noko heile Valen tykkjer om, seier han.
