Nedgang i traktorsalet i 2024 - eitt merke sel framleis godt
John Deere er framleis den mest populære traktoren i landet. I fire år på rad har denne traktoren vore den mest selde.
«Med ein marknadsandel på 22,66 prosent og 521 registrerte traktorar i 2024 stadfestar John Deere sin posisjon som det mest populære traktormerket i Noreg», står det å lesa i ei pressemelding frå Felleskjøpet.
Det er fersk statistikk frå Opplysingsrådet for vegtrafikken (OFV) som er kjelda for tala. Dei grøne traktorane har vore marknadsvinnande dei siste fire åra. Dei siste åra har elles vore prega av dyrtida. Ein vanskeleg sesong i 2023 påverka i tillegg kjøpekrafta i landbruket. Store deler av maskinbransjen har hatt eit utfordrande fjorår.
Annonse
– Dette gjeld også oss i Felleskjøpet, men då er det ekstra gledeleg å konstatera at John Deere held stand som det mest populære traktormerket i Norge. Å bli marknadsleiar for fjerde år på rad er resultatet av ein formidabel jobb som våre tilsette gjer med John Deere, seier kategorisjef Bård Svarstad i Felleskjøpet.
12,2 prosent nedgang
Bonden er kjernekunden til Felleskjøpet. Samstundes har dei ei satsing inn mot anleggs- og entreprenørmarknaden. Hausten 2024 starta eit omfattande opplæringsprogram for traktorseljarar i Felleskjøpet, der alle seljarane deltok på eit tre dagar langt kurs i Tyskland.
Tommy Uttakleiv overtok leiarjobben som Konserndirektør Maskin i Felleskjøpet frå november 2024. Noko av det første konserndirektøren gjorde etter at han starta i fjor haust var å besøka John Deere-fabrikken i tyske Mannheim.
Annonse
– Eg har blitt godt kjent med den store satsinga me har på presisjonsjordbruk saman med John Deere. Dette er eit fruktbart samarbeid. Det gjev inspirasjon til å snu den negative trenden som 2024 har hatt, seier Tommy Uttakleiv.
Til saman vart det registrert 2299 traktorar i Noreg i 2024. Dette er ein nedgang på 12,2 prosent frå året før.
