Korleis var 2022 for bilforhandlarane i Kvinnherad?

Kva bilar gjekk det mest av, elbilar, hybrid eller bensin- og dieselbilar? Kjøpte folk brukt eller nytt? Desse og andre spørsmål retta me til Rødsten Bilforretning, Fylkesnes Bil, Dimmelsvik Bil og Kvinnherad Bil og Teknikk.

Beste nybilsalet til nå

Vegard Jegteberg, dagleg leiar ved Rødsten Bilforretning, kan fortelja at dei selde 203 bilar i fjor. Av desse var 88 nye og 115 brukte.

– Me bikka akkurat 200 selde bilar i 2021, så me klarte tre meir i 2022, seier han nøgd.

Han legg til at omsetjinga vart høgare i 2022 også fordi det var høgare nybilsal då enn året før.

– 2022 er det beste nybilsals-året me har hatt, og eg trur me vil få ei historisk omsetjing, over både 2021 og året før der igjen.

Av dei nye bilane dei har selt har det gått mest elbilar, 66 til saman. Også Plug-in-hybridar har dei selt mange av, heilt nøyaktig 22 bilar. Jegteberg trur det gode salet av Plug-in-hybridar er knytta til at dei har hatt ein modell som har slått an i dagens marknad grunna kort leveringstid.

– Når det gjeld bruktbilar, har me selt blanda drops, seier Jegteberg.

Størstedelen av dette salet har vore bensin- og dieselbilar, men dei har også selt godt av el-bilar her.

– I og med ventetida på nye elbilar, har brukte elbilar vore lette å selja, seier han.

– Har de opplevd noko rush med å få registrert nye elbilar før nyttår, grunna dei auka kostnadane frå januar av?

– Ja, det har vore heilt Texas! ler Jegteberg.

– Me har berre drive og registrert elbilar i heile romjula, morgonskift, ettermiddagskift og kveldsskift! Alle har jobba hardt på!

– Kva bilar er mest populære hos dykk?

– Kia og Subaru er to merke som går godt. Me har selt mykje av den nye Kia Ev6, som er heilelektrisk. Den vart også kåra til årets bil i Europa for 2022. Plug-in-hybridmodellen, Kia Sportage, har også selt bra, seier Jegteberg.

Han legg til at Subaru lanserte sin første heilelektriske bil i fjor, men har hatt noko leveringstid, så den kjem for fullt i 2023.

Eventyråret var i 2021

Håvard Solheim ved Fylkesnes Bil på Husnes fortel at dei selde 156 bilar i 2022, av desse var 86 brukte og 70 nye.

– Det var 2021 som var eventyråret for oss, då tok det heilt av! Me selde 220 bilar, om eg ikkje hugsar feil, det året! I 2022 har det vore litt tilbake til det vanlege, seier han.

Av dei 70 nye bilane dei selde i fjor, var 63 elbilar. Dei selde 15 brukte elbilar same året.

– Me sel mykje brukte fossilbilar, men det går også mykje hybrid på brukt. Kvinnheringane kjøper mykje brukt, slår han fast.

Når det gjeld nybilsalet var Mercedes på topp hos Fylkesnes Husnes, med 22 selde bilar. Elles selde dei 15 Peugeout, 16 Hyunday, og 17 Opel gjennom Opel Haugesund/Stord, som Fylkesnes har tilgang til gjennom Opel-konsernet.

– Det ser ut som om Mercedes har vore ein populær bil hos dykk?

– Ja, Mercedes har fått mange modellar som treff folk. Tidlegare var jo Mercedes ein bil for dei med mest pengar, men slik er det ikkje lenger.

– Opplevde de noko rush med å få ut nye elbilar før nyttår?

– Ja, det var travelt både før jul og i romjula, det var berre å henga i strikken då! ler Solheim.

Han legg til at dei ikkje rakk å få ut alle bilane frå fabrikken til kundane før overgangen til det nye året, men det gjaldt heldigvis ikkje mange. Til nokre kundar klarte dei også å finna alternative løysingar, sluttar han.

Eit år på det jamne

Asbjørn Anfinsen ved Dimmelsvik Bil fortel om eit bra salsår i 2022, som elles ikkje skil seg så mykje frå året før der igjen. Dei selde 95 bruktbilar og 50 nye bilar i fjor, både varebilar og personbilar, seier han. Samanlagt selde dei altså 145 bilar.

– Me har hatt eit bra år når det gjeld brukte varebilar. Det har vore vanskeleg å levera nye varebilar, dermed har me selt ein del brukte.

På brukte personbilar har det gått mykje i hybrid, både Plug-in og vanlege hybridar, seier han.

Av dei 50 nye bilane dei selde, var det både person- og varebilar, hybrid, el og diesel. Flesteparten av personbilane var hybridar av begge typar, men dei selde også 10 nye heilelektriske personbilar i løpet av 2022.

Ein av grunnane til at dei ikkje selde fleire elbilar, var at desse ikkje kom på marknaden før i november.

– Me har fått inn ein ny elbil som har byrja å selja veldig bra. Det er Toyota bZ4X, seier Anfinsen om den «seine» nykommaren på personbilmarknaden.

Når det gjeld varebilane, har dei også selt ein del elbilar, i tillegg til dieselbilar.

– Korleis var nyttårsrushet for dykk i høve nye elbilar som skulle ut?

– Det blei ein del ekstra jobbing, og ein del registreringsutfordringar var det. Men me fekk registrert alt, og hadde god kontroll, så det gjekk fint, konkluderer Anfinsen.

Han legg til at dei er nøgde med året, dei ligg der dei plar å vera.

Selde mest bruktbilar

Hos Kvinnherad Bil og Teknikk har dei også hatt eit år som i stor grad liknar på året før. Dei selde 56 bilar i 2022, og av desse var 15 nye, fortel Olav Per Kaldestad.

– Me hadde selt fleire nye om me hadde hatt fleire på lager, seier Kaldestad.

Også hos dei har det vore leveringsvanskar, noko som resulterte i at dei ikkje fekk nye varebilar før på hausten. Dei har dermed selt mest bruktbilar, og her har dei også kjøpt bilar frå andre forhandlarar, som har avtalar med Suzuki og Renault.

– Av bruktbilar har me selt mest Suzuki SUV 4x4, samt SUV av andre merke. Me har også selt ein del varebilar til kundar i Kvinnherad.

Av nye bilar selde dei blant anna tre bilar av Suzuki S-Cross Hybridmodellen som kom i 2022, og to av modellen A-Cross. Elles vart 4 elbilar selt i 2022, desse av typen Renault Megane E-tech.

– Fekk de registrert desse i god tid før nyttår?

– Ja, 3 vart leverte i november, og 1 i romjula. Og så har me kontraktar på 5 fleire, men dei må leverast i 2023.

Kaldestad refererer til den vanskelege leveringssituasjonen i 2022, som alle bilforhandlarar har opplevd dette året.

– Det står 30.000 bilar i bilimport-hamna i Drammen. Alle desse kjem inn med båt, så du kan tenkja deg det kaoset som er der nede, seier han.

I dette høvet nemner han at dei også marknadsfører og sel Isuzu pick-up, men at dei ikkje har hatt denne inne sidan i fjor vår grunna leveringsvanskar. Nå har dei selt 1 av desse, som skal leverast i år.

Elles kan han fortelja at bilsalet for 2023 alt er i gang.

– Me har selt to bilar denne veka, som me får tak i ganske raskt, sluttar han nøgd.

Leveringsutfordringar

Som kjent har det vore store leveringsutfordringar på nye bilar i 2022, og dette er noko alle bilforhandlarane i Kvinnherad har peika på. Trass i dette er det også tydeleg at bilsalet har gått bra i Kvinnherad, særleg når det gjeld bruktbilar.

Ein annan trend heng saman med girsystemet: Det er få nye bilar med manuelt gir på marknaden, desse er stort sett varebilar som går på diesel. Det er framleis mange som ønsker seg manuelt gir, men det ser ut som om ein må belaga seg på automatgir framover, i følgje bilforhandlarane i Kvinnherad.