– Dette er noko folk likar godt

– Det var om lag 220 bilar her, ikkje inkludert våre eigne. Og om lag klokka 13.30 var det fullt, fortalde leiar i Amcar Kvinnherad Stein Bjarte Kaldestad.

– Når eg såg ut glaset på morgonen klokka ni, og det pøsregna ute, var eg litt luren på å avlysa treffet, sa Stein Bjarte, og la til;

– Eg er veldig nøgd med oppmøte av både køyretøy og tilskodarar, det viser at dette er noko folk likar godt.

Sjå biletserie frå vårmønstringa her;

Vellykka vårmønstring i år òg

Køyretøy frå alle kantar

Amcar Kvinnherad har om lag 48 medlemar, og mange av dei var i sving for å gjera arrangementet til ein suksess. Dotter til Stein Bjarte, Hildegunn Kaldestad, hjelpte til med å registrera køyretøya.

– Vi tok ikkje høgde for alle desse køyretøya, vi trudde eigentleg at folk ville halda seg heime grunna vêret, fortalde ho, og la til;

– No har vi måtta byrja å stua bilane bak Rema, og oppå fortau og langsmed dei andre bilane. Kor enn vi finn plass.

Tidligare på dagen hadde dei fått ein tlf ifrå Odda om at dei måtte avvente køyring grunna snø.

– Det såg mørkt ut ein stund, men så lysna det jo godt opp. For ein halvtime sidan fekk vi ein telefon om at det kom 50 bilar frå Årsnes, og folk strøymer enno på, sa Hildegunn.

Ikkje berre bilar

Det var veldig mange bilar på mønstringa, men også ein del motorsyklar. Ei av dei som hadde tatt turen var Dagny Langva.

– Det var kaldt å køyra motorsykkel i dag, men vi ville ikkje gå glipp av dette, sa Dagny.

Dagny er med i Kvinnherad Motorsykkelklubb, og vil oppfordra alle som køyrer motorsykkel om å melda seg inn i klubben.

– Der er alle velkomne. Og eg vil spesielt invitera ungdomane, dei er hjartans velkomne. Vi ser kanskje skumle ut men vi er det ikkje, smila Dagny, og la til;

– Vi har eit stort nytt MC-hus med verkstad og alt verktøy ein kan trenga. Om ein berre vil koma og skru på ein sykkel kan ein det òg. For dei som ikkje er kome inn i sporten kan kanskje motorsykkelklubben vera ein stad å høyra heime.

Premie nummer to

Etter at folk hadde fått sjå på bilar og syklar var det klart for premiering. Ein jury på tre personar hadde funne fram til dei ti finaste bilane. Ein av dei som vann premie var William Sahr frå Husnes.

– Dette er min Nissan 200SX. Det er ein banebil for veg, fortalde William til Grenda.

Ved sidan av bilen sto ein anna premie, og den hadde William vunne i Haugesund dagen før.

– Der vann eg fyrste plass i kategorien «custom», så no har eg vunne to prisar på 24 timar, det er stas, sa William.