– Betre fysisk rusta enn på lenge

Etter ein god treningssommar utan skadar og sjukdom, ligg Martin Femsteinevik lenger framme i løypa no enn han har gjort på fleire år.  

Marius Tveit Nissestad

Marius Tveit Nissestad

marius@grenda.no

8 oktober, 2017

– Eg går fortare på rulleski og spring fortare i motbakke enn eg har gjort nokon gong. Så fysisk er eg betre rusta enn på lenge, og eg har stor tru på at eg ligg veldig bra an før sesongstart i november, seier Femsteinevik.

 

Persa opp Stoltzen

Eit prov på kor bra rusta han er fekk vi i helga som var. Då opna han laurdag med å slå sin tidlegare personlege rekord opp Stoltzekleiven med elleve sekund, før han sette ny løyperekord under Vengsvatnet rundt.

– Det er jo eit teikn på at ting fungerer. Sjølv om eg hadde eit mål om å koma under ni minutt opp Stoltzen, så kan eg ikkje vera misnøgd med ni minutt og ni sekund når eg slår min tidlegare rekord med elleve sekund, seier Femsteinevik som vart nummer fjorten gjennom syretesten i Bergen.

Trass det leverte han varene dagen etter.

– Eg var ikkje så galen i beina på søndagen, faktisk. No er det mykje verre. Eg går litt rundt og vaggar for å seia det slik, ler han.

 

Frisk siste året

Ein av grunnane til at ting sit betre enn på lenge er at han har vore frisk eit heilt år samanhengande.

– Det er det lengste eg har vore sjukdomsfri, noko som er veldig lovande før sesongen. Så får vi kryssa fingrane for at det held fram.

Og målet før sesongen er klart. Han skal etablera seg som fast inventar på IBU-laget, og gjera det så godt at han vert vanskeleg å oversjå til enkelte verdscuprenn.

– Det er det klare målet. Men sånn det ser ut i år er nålauga for koma seg vidare frå IBU trongare enn på lenge. Men eg viste i fjor at eg kan levera stabilt i IBU, og synst vel eigentleg eg burde fått sjansen i eit verdscuprenn, seier Martin.

Men han trur ikkje det kjem av seg sjølv.

– Min følelse er litt sånn at det hadde vore lettare for meg om eg gjekk for eit forbundslag, og at sånn som det er no så må prestera hakket betre enn ein på eit forbundslag for å få sjansen.

 

Tryggleik på standplass

Men forbundslag eller ei, han skal uansett gjera det vanskeleg for skiskyttarforbundet å oversjå han. For uansett så er det jobben han sjølv legg ned som vert avgjerande. Og jobben han så langt har lagt ned lovar godt.

– Både forma i sporet og på standplass er betre no enn på lenge. Eg føler det einaste som står att er å få litt meir tryggleik til meg sjølv på standplass, så trur eg at eg vi vil sjå at eg får ein solid oppsving på standplass denne sesongen, seier han.

Han er i dag på samling med Team Gla’laks i Voss, og reiser om ikkje mange dagane til Thorsby, Sverige for å få sine fyrste meter på snø.

– Det er tidleg sesongstart i år, så eg prioritere å få gått meg inn på ski i løpet av oktober, så skal eg vera heilt klar til sesongopninga på Sjusjøen 18. november, sluttar Martin.