Bjarte Nerhus, Gunnar Teigland og Olav Høgestøl sytte for trekkspeltonar i fjor, og kjem attende i år. Foto: Terje Øen.

Båtbyggjedag i Ølve

Søndag 19. august inviterer kulturnemnda i Ølve bygdelag til ny båtbyggjedag på skipsbyggjeplassen Øyra på Nerhus.

I fjor vart dette arrangementet ein suksess då 120 menneske kom for å sjå utstillingar på dei to gamle verfta og høyra føredrag om fartøybygging. Ikkje minst var det populært at dei minste fekk byggja seg små båtar.

– Som i fjor vert det utstillingar som fortel om skipsbyggingshistoria. I år handlar føredraget om skottehandelen. Vidar Ask fortel om handel og kulturutveksling med vesterhavslanda på 15- og 1600-talet. Dette er viktig historie for bygdene våre, skriv kulturnemnda i Ølve bygdelag i ei pressemelding.

Artikkelen held fram under annonsen.

Nokre av båtane ved kai på Øyra under båtbyggjedagen 2017. Foto: Terje Øen.

Det vert også i år båtbyggjeri for borna, med basseng der dei kan segla med dei nybygde skutene.

– Tysnes Kystlag vil på ny ta turen til Ølve med nokre av båtane sine, og kanskje kjem det også andre skuter til kai ved moloen. Kafeen kjem til å selja vaflar, saft og kaffi, men også lapskaus slik at det er mogleg å ta søndagsmiddagen på Øyra denne dagen. Som i fjor blir det trekkspeltonar frå Tysnes og Ølve, lovar kulturnemnda.

Båtbyggjedagen blir til i samarbeid med Kystsogevekene.

Borna bygde mange fine båtar i fjor. Foto: Terje Øen.