B-hallen opnar i november

Onsdag kom meldinga mange har venta på. Hydro Husnes opnar B-hallen i november.

Hydro har vedteke å restarta produksjonen i B-hallen på Husnes innan utgangen av november, etter å ha køyrd med halv kapasitet i meir enn ti år.

– Vi er veldig glade for å endeleg setja B-hallen på Husnes tilbake i drift, og dra nytte av dei omfattande teknologioppgraderingane vi har gjort og la våre tilsette og Husnes-samfunnet sjå framover etter mange år med usikkerheit, seier konserndirektør Eivind Kallevik for primærmetall i Hydro i ei pressemelding.

Dei tilsette fekk jubelbeskjeden på eit ålmannamøte onsdag føremiddag.

– Dei tilsette er letta og glade for at vi no kan starta igjen. Organisasjonen her har jobba hardt og målretta over tid for å koma hit. Så dette er veldig fortent, seier fabrikksjef Johan Berg til Grenda.

 

Viktig byggjekloss

I byrjinga av april innførte Hydro sentralt ei rekkje tiltak for å bøta på verknadane av koronapandemien. Eitt av tiltaka var å utsetja opninga av B-hallen på Husnes. Då var oppgraderingsprosjektet til 1,5 milliardar kroner klar for å starta opp.

– Med oppgraderingane i B-hallen er Husnes blant dei mest klimaeffektive aluminiumsverka i verda, og produserer eit materiale som EU anerkjenner som ein viktig byggjekloss for det sirkulære lågkarbonsamfunnet, seier Kallevik

I dag produserer Hydro nærmare 100.000 tonn primæraluminium i året. Det vil doblast når B-hallen er i full drift.

– Avgjersla om å opna B-hallen er basert på forbetringar i marknaden, kombinert med forventningar om at Norge vil halda fram å nytta seg av EU sine retningslinjer for kompensasjon av indirekte CO2-kostnadar for perioden 2021-2030, står det å lesa i pressemeldinga.

 

Tryggleik for dei tilsette

Fabrikksjef Johan Berg kallar den reviderte oppstartplanen eit «tilbake til framtida»-augeblikk for Husnes, etter eit tiår med usikkerheit.

– Vi tar no eit stort skritt mot å sikra framtida til våre kollegaer og heile lokalsamfunnet, og tar Husnes tilbake betre og grønare enn nokosinne, seier Johan Berg.

Hovudtillitsvald Ørjan Normann seier at avgjersla kjem på eit heilt avgjerande tidspunkt for dei tilsette, som opplevde fornya usikkerheit då Covid-19 sette kjeppar i hjula for oppstarten.

– I tillegg til bringa tryggleik til våre kollegaer, vil dette gjera det mogleg for våre mange nye tilsette og deira familiar å endeleg sjå framover, bygga sine eigne liv her lokalt og med det også framtida for dette samfunnet, seier Ørjan i pressemeldinga og legg til:

– No er det opp til regjeringa å bruka handlingsrommet EU gir fullt ut, til å sikra og vidareutvikla vår fornybarbaserte aluminiumsproduksjon, og med det gi industrien med det lågaste klimaavtrykket ei langsiktig framtid her i Norge.