Avsluttar sesongen med lokaloppgjer

Laurdag tek Halsnøy turen til Rosendal Stadion for å måla krefter med kvittrøyene til Trond Inge Haugland.

Denne helga vert den siste duellen vunnen, den siste stikkpasningen slått og det siste halvslappe mottaket teke i 2019-sesongen for herrelaga til Rosendal og Halsnøy. Det skjer på Rosendal Stadion laurdag ettermiddag, kor det er duka for eit heidundrande lokaloppgjer.

I det motsette oppgjeret i sommar, kor Halsnøy avduka sitt nye klubbhus, var Rosendal det klart beste laget. Likevel kjempa blåtrøyene til dåverande trenar, Tor Gundersen, til seg eit poeng og 2-2 på heimebane.

Sidan då har vinden snudd i dei to leirane. Halsnøy har krabba seg ut av sumpa og løfta seg heilt opp i toppen av tabellen, og kjempar no med Viggo om tredjeplassen i avdelinga, medan Rosendal har gått på nok knipne poengtap til at dei går inn i siste serierunde med alt å spela for. Dei står nemleg framleis i fare for å rykka ned til 7. divisjon.

Ein skjebne dei har i sine eigne hender. Tek dei poeng mot Halsnøy er det umogleg for Nore Neset/Lysekloster 2 å ta dei igjen på poeng, men skulle dei der i mot tapa mot Halsnøy samstundes som Nore Neset skulle slå avdelingsvinnar Trane, er nedrykket eit faktum.

Då går nemleg Nore Neset forbi som følgje av at dei har møtt opp til fleire kampar denne sesongen enn Rosendal.

Så står det att å sjå korleis det går når kamphanane møtest på Rosendal stadion laurdag. Av målscorarane frå 2-2-kampen i mai, er det berre Håvard Vågen som er venta å starta kampen. Mats Paulsen, Dennis Gamst og Stig Are Helle entra truleg ikkje banen.