Avlyser løp og utset årsmøte

Marius Tveit Nissestad

Marius Tveit Nissestad

marius@grenda.no

Publisert: 6. april 2020, 14:12

Rosendal Turnlag har bestemt seg for å avlysa årets utgåve av baroniløpet som følgje av koronapandemien.

– Det er kjedeleg. No hadde vi fått baroniløpet inn på terminlista som eit godkjent mosjonsløp, så vi trur at vi hadde fått fleire tilreisande deltakarar. Men akkurat no er det viktigare ting å ta omsyn til, så får vi heller koma sterkare tilbake neste år, seier dagleg leiar Jonathan Byrkjenes i Rosendal Turnlag.

Baroniløpet skulle gått av stabelen i slutten av april.

I midten av april, nærmare bestemt 14. april, skulle turnlaget ha held årsmøte for 2020. Men på grunn av restriksjonar knytt til koronapandemien, har laget bestemt seg for å utsetja det på ubestemt tid.

– Vi ynskjer å få samla medlemene på eit slikt møte, men sånn som det er i dag så er ikkje det mogleg. Så får vi sjå kva regjeringa seier i løpet av påsken. Ser vi at det vil ta lang tid før ein kan samla fleire personar på same stad, så må vi sjå på ei mogleg digital løysing, seier Byrkjenes.