Aurora til Festidalen

Første sjanse til å oppleva Aurora på ei scene i Hordaland i 2020, vert på Dønhaug og Festidalen. Det er også den einaste festivalen ho gjer i fylket det året.

Ho er framleis berre 23 år, likevel har ho alt blitt streama over 200 millionar gongar, fått peisen full av prisar og lagt både land og utland for sine føter. Siste helga i juni kjem ho til Uskedalen for å servera Festidalen-publikummet sin musikk.

– Kva høver vel betre enn å sleppa den største og mest særeigne stjerna av alle i julemånaden? Aurora lyser over taket der han Magne bur. Og tre tusen vise og uvise jenter, gutar, kvinner og menn legg ut på vandringa mot 26. juni. ME er ikkje så keisame at me feirar røykelse og myrra. Men gull? Litt blink-bling vert det i alle fall, seier Daidalos Dahle i ei pressemelding.

 

- Blir fabelaktig 

Med Aurora har bookingansvarleg ført dei to første penselstrøka på neste års festivalplakat. Sjølv kan Daidalos nesten ikkje venta med å få oppleva Aurora på jordet i Uskedalen.

– Ho er nesten unaturleg naturleg. Tidvis tander og audmjuk, andre stunder trolsk og fandenivoldsk. Stemma vandrar frå å representera rein urkraft til å rota fram lyden av ditt indre barn. Ho er fascinerande mystisk, ho Aurora, seier han.

Med sin elektroniske pop har Aurora slått seg opp på hitlister i både inn og utland med låtar som «Running with the Wolves», «Runaway» og «The River», at ho no kjem til Uskedalen får Daidalos til å lova at Festidalen 2020 vert fantastisk.

– Eg er overtydd om at 2020 vert eit fabelaktig Festidalen-år. Først slepp me to sterke kvinner frå kvar si side av popen. Snart slepp me nokre menn frå både rocke- og rapsida. Om ikkje dette vert kjekt, så kan du gi meg ein high-five i trynet. Med ein barkrakk! Me gler oss, sluttar han.