Åtvarar mot opne vatn og snøskredfare

Måndag sendte Røde Kors ei generell åtvaring mot høg skredfare, og oppmodar alle som skal ut i fjellet på ski om å følgja fjellvettreglane. Det gjeld for Kvinnherad også.

– Alle bekkar og vatn er stort sett opne, og snøen er laus opp til Ingahogg, så ein skal vera varsam, seier Olav Gunnar Hjelmeland når Grenda spør han om tilhøva i vinterferiefjellet i Fjellhaugen-området.

– Det er kome mykje snø no, men det er også mykje rote underlag, utdjupar han.

Konsekvensen av tilhøva er at han først fekk preparert løype innover mot Nautavatn i førre veke.

– Der er det slik at går du utanom der det er preparert, går du rett ned i sørpa, meiner han.

Det er først den siste tida at tilhøva har blitt tilfredsstillande for skifolket.

– I dag kom eg for første gong i vinter til Grønlitjødna med løypemaskinen, seier Hjelmeland til Grenda måndag.

 

Snøgrense

Hjelmeland meiner det går ei markert snøgrense i Fagnabotn.

– Det same er tilfelle øvst i skitrekket også. Der er det godt med snø, og alpinbakken er veldig fin. Korleis det blir med køyring av trekket i vinterferien, har eg ikkje heilt kontroll på. Der vil eg oppmoda dei interesserte til å halda seg oppdaterte via skisenteret sine nettsider og Facebook-side. I lysløypa er det også veldig fine tilhøve, seier løypemeisteren.

Tidlegare vintrar har Ingahogg vore eit ynda mål for turgåarar og frikøyrarar.

– Eg har ikkje sett så mange spor den vegen til no i vinter. Ein skal generelt vera litt forsiktig med å gå dit no, for ved Ingahogg heng snøen veldig laust, åtvarar Hjelmeland.