Åshild Ulstrup tar sunnhordlendingen til senioruniversitetet

Freelands Grenda

Grenda

post@grenda.no

Publisert: 7. mars 2020, 15:09

Åshild Ulstrup, journalist, forfattar, radiomedarbeidar og føredragshaldar, kjem til møte i Kvinnherad Senioruniversitet torsdag 12. mars. Ho vil ta for seg Sunnhordlendingen slik han er, sett frå hennar ståstad.

Ulstrup er særleg kjend for personlege intervju i NRK gjennom 40 år, mellom anna i radioprogramma «Sånn er livet», «På livet laus» og «Middagsstunden». Ulstrup har òg gjeve ut fleire dokumentar- og intervjubøker.

Ulstrup vaks opp på Valen i Kvinnherad. For over 60 år sidan reiste Åshild Ulstrup frå heimbygda; sidan har Oslo vore heimstaden hennar. I 2015 kom boka «Om Galskap og eventyr» – ei reise tilbake til barndommen. I boka går Ulstrup tilbake til ein uvanleg barndom i ei bygd med eit mangfald av liv og lagnader, landskap og opne dører. Ho som sjølv gjennom eit langt journalistliv har fått både gamle og unge i tale, fått dei til å opne seg, snakke om livet, om draumar og håp, fortel her om sin eigen oppvekst.

Vi ser fram til eit triveleg møte i Kulturhuset på Husnes med ein framifrå kåsør. Det vert som vanleg på senioruniversitetet sine møte, noko å bite i og kaffi etter føredraget. Møta i Senioruniversitetet er opne for alle interesserte som har høve til å delta på arrangement midt på dagen. Vel møtt!

 

Av: Kvinnherad Senioruniversitet