Klart for kåring av «Årets namn» - innfører ny røystemetode

I år vert det fyrst utslagsrunde i kåringa av «Årets namn i Kvinnherad». Dei tre med flest røyster går vidare til finalen.

Trass i at konseptet for «Årets namn»-kåringa har fungert bra i alle år, dristar Grenda seg no til å testa ut ei endring i opplegget. Nyhendet går ut på at de i dag får sjå 16 personar som utgjer utslagsrunden. Dei tre som sikrar seg flest røyster går vidare til finalen.

Dette er ein metode fleire andre media har brukt i sine kåringar. Bakgrunnen er elles at det er svært mange gode kandidatar i år, og det er vanskeleg å plukka ut kven som får vera med i kåringa eller ikkje. I tillegg tenkjer avisa at dette grepet i større grad vil hindra at kandidatane «slår kvarandre i hel». Metoden kan elles samanliknast med presidentvala i mange land, der det vert gjennomført fleire rundar heilt til ein person har sikra seg meir enn 50% av røystene. Men fleire rundar har ikkje vi tid til; difor ein utslagsrunde fyrst, etterfølgd av den store finalen.

Mange forslag

Det må ha vore eit godt år for Kvinnherad og folket her, for det kom inn uvanleg mange forslag på kandidatar. I tillegg har dei tilsette i Grenda notert seg gode forslag året gjennom. Vi valde å setja grensa på 16 kandidatar i fyrste runde, men kunne teke med endå fleire.

– Det er med stor glede at vi igjen får moglegheita til å kåra Årets namn i Kvinnherad. Det er kjekt å setja søkeljoset på og gje litt merksemd til nokon av dei som har gjort ein spesiell innsats i 2023. Dette blir spennande, kommenterer redaktør Håvard Sætrevik.

Dei 16 kandidatane vert presenterte på heimesida onsdag kveld og i papiravisa torsdag. No er det opp til folk der ute til å senda tre vidare til finalen.